நடிகர் தனுஷ் தனது பிறந்தநாளை முன்னிட்டு நடைபெற்ற நலத்திட்ட உதவிகள் வழங்கும் விழாவில், ரசிகர்களின் ஒற்றுமைக்கு ஒரு பெரிய “நோக்கம்” தேவை என்று பேசியதைத் தொடர்ந்து, அவரும் தீவிர அரசியலில் தடம் பதிக்கத் தயாராகி வருகிறாரா என்ற விவாதம் தமிழக அளவில் சோசியல் மீடியாவில் தீயாகப் பற்றி எரிகிறது. “ஏன் நானெல்லாம் அரசியலுக்கு வரக் கூடாதா?” என்று கேட்கும் வகையில் அவரது பேச்சு மற்றும் ரசிகர் மன்றத்தின் சமீபத்திய நகர்வுகள் அமைந்திருப்பதாகப் திரை மற்றும் அரசியல் விமர்சகர்கள் கருத்து தெரிவித்து வருகின்றனர்.
தனது பிறந்தநாளை முன்னிட்டுச் சென்னையில் ஏற்பாடு செய்யப்பட்டிருந்த ரத்த தான முகாம் மற்றும் நலத்திட்டங்கள் வழங்கும் நிகழ்வில் கலந்துகொண்டு பேசிய தனுஷ், “இவ்வளவு பேர் ஒரே இடத்தில் கூடியிருக்கிறீர்கள்; இந்த ஒற்றுமைக்கு மிகப் பெரிய சக்தி உண்டு. வெறும் ஆடியோ வெளியீட்டு விழாக்கள் மற்றும் சந்திப்புகளோடு நிறுத்திவிடாமல், அதைத்தாண்டி நீங்கள் வாழும் பகுதி மக்களுக்குத் தேவையான உதவிகளைச் செய்யுங்கள்” என ரசிகர்களுக்கு அழைப்பு விடுத்தார். அவரது இந்தப் பேச்சுதான் தனுஷின் மறைமுக அரசியல் நகர்வின் தொடக்கப்புள்ளி என நெட்டிசன்கள் பலராலும் ஊகிக்கப்பட்டு வருகிறது.
முன்னதாக, தனுஷின் நற்பணி மன்றத்தினர் சிவப்பு மற்றும் வெள்ளை வண்ணத்தில் நட்சத்திரம் மற்றும் அவரது உருவம் பொறிக்கப்பட்ட புதிய கொடியை அறிமுகப்படுத்தியதும், “எண்ணம்போல் வாழ்க்கை” என்ற முழக்கத்தைச் சமூக வலைத்தளங்களில் பரப்பியதும் இந்த சந்தேகத்திற்கு வலு சேர்த்துள்ளது. மேலும், தனுஷின் தந்தை கஸ்தூரி ராஜாவிடம் இது குறித்துக் கேட்டபோது, “அரசியலுக்கு யார் வேண்டுமானாலும் வர உரிமையுள்ளது” என மறுப்பு தெரிவிக்காமல் கூறியிருந்தது குறிப்பிடத்தக்கது.
விஜய் தனது மக்கள் இயக்கம் மூலம் நலத்திட்ட உதவிகளைச் செய்து பின்னர் தவெக கட்சியைத் தொடங்கியது போலவே, தனுஷும் தனது ரசிகர் மன்றங்களை ஒருங்கிணைத்து அரசியல் களம் அமைத்து வருவதாகப் பேச்சுகள் அடிபடுகின்றன. இருப்பினும், தனுஷ் அல்லது அவரது தரப்பிலிருந்து தேர்தல் அரசியல் குறித்து அதிகாரப்பூர்வமாக எந்த அறிவிப்பும் வெளியாகவில்லை. அசுரன், கர்ணன், வடசென்னை போன்ற படங்கள் மூலம் சமூகப் பிரச்சனைகளைப் பேசிய தனுஷ், நிஜ வாழ்விலும் அரசியலுக்குள் நுழைவாரா என்பது கோலிவுட் வட்டாரத்தில் தற்போதைய ஹாட் டாபிக்காக மாறியுள்ளது.
