தமிழகச் சட்டப்பேரவை பட்ஜெட் கூட்டத்தொடரின் போது, தவெக அரசின் நிதியமைச்சர் மரியவில்சன் ஆற்றிய உரை மற்றும் அவரது தமிழ் உச்சரிப்பு குறித்து எதிர்க்கட்சியான திமுக உறுப்பினர்கள் கேலி எழுப்பியதால் அவையில் பெரும் சலசலப்பு ஏற்பட்டது. திமுக உறுப்பினர்களின் தொடர் கூச்சலுக்குப் பதிலளித்துப் பேசிய அமைச்சர் மரியவில்சன், “நீங்க கத்துனா நானும் கத்துவேன்! நான் இப்படித்தான் பேசுவேன், என்னை எதுக்காகக் கேலி பண்றீங்க?” என ஆவேசமாக முழங்கியது அவையில் அதிர்வலைகளை ஏற்படுத்தியது.
முன்னதாக, வெள்ளை அறிக்கை மற்றும் வரவு செலவுத் திட்ட அறிக்கையை வாசித்த போது நிதியமைச்சர் மரியவில்சனின் தமிழ் உச்சரிப்பில் சில பிழைகள் மற்றும் தடுமாற்றங்கள் இருந்ததாகக் கூறி எதிர்க்கட்சி உறுப்பினர்கள் அவரைத் தொடர்ச்சியாக விமர்சித்து வந்தனர். பேரவையில் அவர் உரையாற்றத் தொடங்கியதும் திமுக எம்பிக்கள் மற்றும் எம்எல்ஏக்கள் சத்தமிட்டு இடையூறு விளைவிக்க முயன்றனர். இதனால் கோபமடைந்த அமைச்சர், “ரிலாக்ஸ்… கூல்… நீங்கள் கத்திக் கொண்டே இருக்க வேண்டியதுதான்” என அமளி செய்த உறுப்பினர்களைப் பார்த்துக் கடுமையான தொனியில் கூறினார்.
தொடர்ந்து பேசிய அவர், தாய்மொழியில் பேசும்போது இயல்பாக வரும் உச்சரிப்பைக் கேலி செய்வது முறையல்ல என்றும், அவையின் விவாதப் பொருளை விட்டுவிட்டுத் தனிப்பட்ட முறையில் கேலி செய்வதைப் ஏற்றுக்கொள்ள முடியாது என்றும் கண்டனம் தெரிவித்தார். நிதி மேலாண்மை மற்றும் வளர்ச்சித் திட்டங்கள் குறித்த வெள்ளை அறிக்கையின் உண்மையான தரவுகளைக் கண்டு அச்சப்பட்டே எதிர்க்கட்சியினர் இதுபோன்ற தேவையற்ற சச்சரவுகளில் ஈடுபடுவதாகத் தவெக தரப்பில் குற்றம் சாட்டப்பட்டது.
அமைச்சரின் இந்த ஆவேசப் பேச்சைத் தொடர்ந்து அவையில் மீண்டும் காரசாரமான வாக்குவாதங்கள் வெடித்தன. இருப்பினும் சபாநாயகர் தலையிட்டு உறுப்பினர்களை அமைதிப்படுத்தியதைத் தொடர்ந்து பேரவை நிகழ்வுகள் தடையின்றித் தொடர்ந்தன. தமிழ் உச்சரிப்பு குறித்த விமர்சனங்களுக்குப் பயப்படாமல் சட்டப்பேரவையில் அமைச்சர் மரியவில்சன் எதிர்த்து நின்ற இந்த வீடியோ துணுக்குகள் சமூக வலைத்தளங்களில் வைரலாகி விவாதப் பொருளாக மாறியுள்ளன.
