பிரிட்டிஷ் அரச குடும்பத்தில் வேல்ஸ் இளவரசியான கேட் மிடில்டன் (Kate Middleton) இணைவதற்கு முன்பாக, அவரது பெயரின் எழுத்து உச்சரிப்பை மாற்றியமைக்குமாறு தற்போதைய மன்னர் சார்லஸும் அரசி கமிலாவும் கோரிக்கை விடுத்ததாகவும், இதைக் கேட்டு இளவரசர் வில்லியம் கடும் கோபமடைந்ததாகவும் புதிய அரச குடும்பப் புத்தகத்தில் (Royal Biography) திடுக்கிடும் தகவல் வெளியாகியுள்ளது.
பிரபல எழுத்தாளர் கிறிஸ்டோபர் ஆண்டர்சன் எழுதிய ‘கேட்!’ (Kate! The Courage, Grace, and Power of the Woman Who Will Be Queen) என்ற நூலில் இந்த விவரிக்கப்பட்டுள்ளது. கேட் மிடில்டனின் அதிகாரப்பூர்வப் பெயர் ‘கேத்தரினா’ (Catherine) என்பதாகும். ஆனால், அக்காலக்கட்டத்தில் மன்னர் சார்லஸ் மற்றும் கமிலா ஆகிய இருவரின் அரச முத்திரைகளும் (Royal Cyphers) ‘C’ என்ற ஆங்கில எழுத்திலேயே தொடங்கின. எனவே, மூன்றாவதாக மற்றொரு ‘C’ எழுத்து இடம்பெற்றால் குழப்பம் ஏற்படும் எனக் கூறி, கேட் தனது பெயரை ‘K’ எழுத்தில் தொடங்குமாறு (‘Katherine’) மாற்றிக் கொள்ளக் கோரப்பட்டதாகக் கூறப்படுகிறது.
அரச குடும்பத்தின் பிராண்டிங் மற்றும் முத்திரைகளுக்காக, கேட் மிடில்டனின் பெற்றோர்களால் சூட்டப்பட்ட பெயரை மாற்றச் சொன்ன இந்த உத்தரவு இளவரசர் வில்லியமை நிலைகுலையச் செய்தது. இது கேட் மிடில்டனுக்கும் அவரது குடும்பத்தினருக்கும் இழைக்கப்பட்ட மிகப்பெரிய “அவமானம்” என்று கருதிய வில்லியம், தனது தந்தை சார்லஸிடம் இது தேவையற்ற தலையீடு என ஆவேசமாக எதிர்ப்பைப் பதிவு செய்தார்.
பெயரை மாற்றும் இந்த விசித்திரமான கோரிக்கையை இளவரசர் வில்லியமும் கேட் மிடில்டனும் உடனடியாக நிராகரித்து விட்டனர். இச்சம்பவம் குறித்து இளவரசர் ஹாரியும் தனது ‘ஸ்பேர்’ (Spare) சுயசரிதைப் புத்தகத்தில் ஏற்கனவே குறிப்பிட்டிருந்தார். இருப்பினும், இத்தகைய ஆரம்பகால சர்ச்சை சம்பவங்களுக்குப் பிறகும், தற்போதைய சூழலில் மன்னர் சார்லஸும் இளவரசி கேட் மிடில்டனும் ஒருவருக்கொருவர் மிகுந்த மரியாதையுடனும் நெருக்கத்துடனும் பழகி வருவது குறிப்பிடத்தக்கது.
