ரஷியா மற்றும் உக்ரைன் இடையிலான போர் உச்சக்கட்டத்தை எட்டியுள்ள நிலையில், உக்ரைனின் தற்கொலைப்படை ட்ரோன்கள் ரஷியாவின் வர்த்தக மையங்கள் மீது தீவிரத் தாக்குதலைத் தொடுத்து வருகின்றன. ‘ரஷியாவின் அமேசான்’ என்று பிரபலமாக அழைக்கப்படும் ‘வைல்ட்பெர்ரீஸ்’ (Wildberries) ஈ-காமர்ஸ் நிறுவனத்தின் மிகப்பெரிய சேமிப்புக் கிடங்குகளை இலக்கு வைத்து உக்ரைன் நடத்திய தொடர் ட்ரோன் தாக்குதல்களால், மாஸ்கோ மற்றும் அதைச் சுற்றியுள்ள பகுதிகள் புகை மண்டலமாகக் காட்சியளிக்கின்றன.
ரஷிய அதிபர் விளாடிமிர் புடினின் பொருளாதாரச் சங்கிலியை முடக்கும் நோக்கில், உக்ரைன் ராணுவம் நூற்றுக்கணக்கான தொலைதூர ட்ரோன்களைப் ஒரே நேரத்தில் ஏவி இந்த அதிரடித் தாக்குதலை நடத்தியுள்ளது. மாஸ்கோ மற்றும் செயிண்ட் பீட்டர்ஸ்பர்க் உள்ளிட்ட முக்கிய நகரங்களில் அமைந்துள்ள வைல்ட்பெர்ரீஸ் நிறுவனத்தின் சரக்கு விநியோக மையங்கள் தீப்பிடித்து எரிந்ததில், பில்லியன் கணக்கான டாலர் மதிப்புள்ள பொருட்கள் முற்றிலும் சேதமடைந்துள்ளதாக சர்வதேச ஊடகங்கள் செய்தி வெளியிட்டுள்ளன.
இந்தத் தாக்குதல்கள் குறித்துப் பேசிய உக்ரைன் அதிபர் வோலோடிமிர் ஜெலென்ஸ்கி, மேலோட்டமாக வணிகக் கிடங்குகளாகத் தோன்றும் இந்த மையங்கள், உண்மையில் ரஷிய ராணுவத்திற்குத் தேவையான ட்ரோன் பாகங்கள் மற்றும் வழிசெலுத்தல் கருவிகளை (navigation equipment) விநியோகிக்கும் மையங்களாகச் செயல்பட்டு வந்ததாகக் குற்றம் சாட்டியுள்ளார். உக்ரைனிய நகரங்கள் மீது ரஷியா தினமும் நடத்தி வரும் கொடூரமான ஏவுகணைத் தாக்குதல்களுக்கு இது நியாயமான பதிலடி என்றும் அவர் குறிப்பிட்டுள்ளார்.
ரஷியாவின் பொருளாதார அரணை தகர்ப்பதோடு மட்டுமல்லாமல், போரின் கொடூரத்தை ரஷியப் பொதுமக்களின் வாசற்படிக்கே கொண்டு செல்லும் மூலோபாய உத்தியாக உக்ரைனின் இந்த ட்ரோன் படை எடுப்பு பார்க்கப்படுகிறது. ரஷிய வான் பாதுகாப்பு அமைப்புகளை மீறி உக்ரைன் நடத்தி வரும் இத்தகைய தாக்குதல்கள், ரஷியாவின் சப்ளை சங்கிலியைக் கடுமையாகப் பாதித்துள்ளதுடன், போர்க்களத்தில் அடுத்தகட்டப் பின்னடைவைச் சந்திக்கும் நிலைக்கு மாஸ்கோவை தள்ளியுள்ளது.
