தமிழ்நாடு அரசு சார்பில் புனித ஜார்ஜ் கோட்டையில் நடைபெற்ற சுதந்திர தின விழா நிகழ்வில் நடிகை த்ரிஷா பங்கேற்று, விஜய்யின் பெற்றோருடன் முன்வரிசையில் அமர்ந்திருந்தது அரசியல் ரீதியாக பெரும் விவாதங்களை ஏற்படுத்தியுள்ளது. திமுகவின் அதிகாரப்பூர்வ நாளிதழான ‘முரசொலி’ இந்த நிகழ்வைக் கடுமையாக விமர்சித்து கட்டுரை வெளியிட்டிருந்த நிலையில், இந்த விவகாரம் தொடர்பாகப் பிரபல நடிகை சஞ்சனா கல்ராணி த்ரிஷாவுக்கு ஆதரவாகக் குரல் கொடுத்துள்ளார்.
ஊடகங்களுக்கு அளித்தப் பேட்டியில் பேசிய சஞ்சனா கல்ராணி, “விஜய்யின் அரசியல் செயல்பாடுகள் குறித்து விமர்சிக்க தைரியம் இருந்தால் தாராளமாகப் பேசுங்கள்; அதை விட்டுவிட்டு தேவையில்லாமல் ஒரு பெண்ணை ஏன் இதில் இழுத்து டார்கெட் செய்கிறீர்கள்?” என்று கேள்வி எழுப்பியுள்ளார். விஜய்யை அரசியல் ரீதியாக எதிர்கொள்ள முடியாதவர்கள், அவரது தனிப்பட்ட வாழ்க்கையை வைத்து அவதூறு பரப்ப முயல்வதாக அவர் சுட்டிக்காட்டினார்.
தொடர்ந்து பேசிய அவர், “த்ரிஷா திரையுலகில் தனது சொந்த உழைப்பால் உயர்ந்த ஒரு வெற்றிகரமான நடிகை; அவருக்கு அளிக்க வேண்டிய உரிய மரியாதையை அனைவரும் கொடுக்க வேண்டும்” எனக் கூறினார். மேலும், இருவருக்கிடையிலான தனிப்பட்ட நட்பையோ அல்லது உறவையோ அரசியல் லாபத்திற்காகப் பயன்படுத்தக் கூடாது என்றும், ஒரு பெண்ணின் கண்ணியத்தைக் குறைத்து மதிப்பிடுவதை ஏற்றுக்கொள்ள முடியாது என்றும் அவர் உறுதியாகத் தெரிவித்தார்.
விஜய்யின் வேகமான அரசியல் செயல்பாடுகளையும் அவரது மக்கள் நலப் பணிகளையும் பாராட்டிய சஞ்சனா, குறைகளைக் கண்டுபிடிக்க முடியாத சூழலிலேயே இதுபோன்ற தனிப்பட்ட விமர்சனங்கள் முன்வைக்கப்படுவதாகத் தெரிவித்தார். த்ரிஷாவுக்கு ஆதரவாக சஞ்சனா கல்ராணி பேசியுள்ள இந்த கருத்துகள், சமூக வலைதளங்களிலும் அரசியல் வட்டாரத்திலும் தற்போது மிக வேகமாகப் பரவிப் புதிய விவாதத்தைத் தோற்றுவித்துள்ளன.
