பிரிட்டனில் இயங்கி வரும் 1,000-க்கும் மேற்பட்ட தொண்டு நிறுவனங்களுக்கு மென்பொருள் சேவை வழங்கி வரும் ‘பீக்கான் சிஆர்எம்’ (Beacon CRM) என்ற முன்னணி வாடிக்கையாளர் மேலாண்மை நிறுவனத்தின் கணினி அமைப்பில் புகுந்த ஹேக்கர்கள், பிரம்மாண்ட சைபர் தாக்குதலை நடத்தியுள்ளனர். இந்தத் தொழில்நுட்ப ஊடுருவல் காரணமாக அந்தத் தொண்டு நிறுவனங்களுக்கு நிதி உதவி அளித்து வந்த லட்சக்கணக்கான நன்கொடையாளர்கள், தன்னார்வலர்கள் மற்றும் ஆதரவாளர்களின் தனிப்பட்ட விவரங்கள் திருடப்பட்டுள்ளதாக உறுதிப்படுத்தியுள்ளன.
நிறுவனத்தின் அமேசான் வெப் சர்வீசஸ் (AWS) அமைப்பைப் பாதுகாக்கும் ரகசிய அணுகல் சாவி (Access Key) தவறுதலாகப் பொது இணையதளக் குறியீடுகளில் வெளியானதே இந்தச் சைபர் ஊடுருவலுக்கு முதன்மைச் சான்றாக அமைந்துவிட்டது. இதன் மூலம் அமைப்பிற்குள் ஊடுருவிய மர்ம நபர்கள், நன்கொடையாளர்களின் பெயர்கள், மின்னஞ்சல் முகவரிகள், தொலைபேசி எண்கள் மற்றும் நன்கொடை குறித்த ஆவணங்கள் அடங்கிய காப்புப் பிரதி (Database Backup) தரவுகளைப் பதிவிறக்கம் செய்து திருடியுள்ளனர்.
இந்தத் தாக்குதலின் மூலம் வங்கிக் கணக்கு அல்லது ஏடிஎம் அட்டை விவரங்கள் திருடப்படவில்லை என்றாலும், திருடப்பட்டத் தகவல்களைப் பயன்படுத்திப் போலி மின்னஞ்சல்கள் (Phishing Scams) மற்றும் நிதி மோசடிகள் அரங்கேறக்கூடும் எனப் பாதுகாப்பு வல்லுநர்கள் எச்சரித்துள்ளனர். இச்சம்பவத்தைத் தொடர்ந்து இங்கிலாந்தின் தகவல் ஆணையர் அலுவலகத்திற்கு (ICO) உடனடியாகத் தகவல் தெரிவிக்கப்பட்டு விசாரணை முடுக்கி விடப்பட்டுள்ளது.
பாதிக்கப்பட்ட தொண்டு நிறுவனங்கள் தங்களது நன்கொடையாளர்களைத் தொடர்புகொண்டு விழிப்புணர்வுடன் இருக்குமாறும், சந்தேகத்திற்கிடமான குறுஞ்செய்திகள் அல்லது இணைப்புகளைச் சொடுக்க வேண்டாம் என்றும் கேட்டுக்கொண்டுள்ளன. மனிதநேயப் பணிகளில் ஈடுபடும் தொண்டு நிறுவனங்களையே இலக்கு வைத்து நடத்தப்பட்ட இந்த மாபெரும் சைபர் தாக்குதல், பிரிட்டன் தகவல் தொழில்நுட்பத் துறையிலும் தொண்டு நிறுவனங்கள் மத்தியிலும் பெரும் கொந்தளிப்பை ஏற்படுத்தியுள்ளது.
