தமிழ்நாடு சட்டமன்ற உறுப்பினர்களுக்கு (MLA) அரசு சார்பில் புதிய கார்கள் வழங்கப்படும் என்றும், வாகனப் பராமரிப்புக்காக மாதம் ₹1 லட்சம் வரை படிகள் வழங்கப்படும் என்றும் அரசுத் தரப்பில் அறிவிப்பு வெளியானது. இந்த அறிவிப்பைத் தொடர்ந்து, மக்கள் பிரதிநிதிகளுக்கு இத்தகையச் சலுகைகள் தேவையா என்ற விவாதம் தீவிரமடைந்துள்ள நிலையில், பாமக சட்டமன்ற உறுப்பினரான சௌமியா அன்புமணி தனக்கு அரசு கார் வேண்டாம் எனத் திட்டவட்டமாக மறுத்துள்ளார்.
சட்டப்பேரவை வளாகத்தில் செய்தியாளர்களைச் சந்தித்த சௌமியா அன்புமணி, “எங்களிடம் ஏற்கனவே பயன்பாட்டிற்கு வாகனங்கள் உள்ளன. எனவே, அரசு நிதிப் பணத்தில் எங்களுக்குப் புதிய கார்கள் தேவையில்லை. எம்.எல்.ஏ-க்களுக்கு கார் வாங்குவதற்கும் பராமரிப்பதற்கும் ஒதுக்கப்படும் அந்த நிதியை, எங்கள் தொகுதி விவசாயிகளின் பயன்பாட்டிற்காகப் பயன்படுத்த வேண்டும்” என வேண்டுகோள் விடுத்தார்.
குறிப்பாக, கிராமப்புற மற்றும் விவசாயத் தொகுதிகளில் அறுவடை செய்யப்படும் நெல் மூடைகளைப் பாதுகாப்பாக வைக்கவும், தாமதமின்றி கொள்முதல் செய்யவும் போதிய உட்கட்டமைப்புகள் இல்லை என்பதைச் சுட்டிக்காட்டினார். இதனால் விவசாயிகள் தங்களின் மகசூலைத் திறந்தவெளியில் போட்டு வைத்துக் கடும் சிரமங்களைச் சந்தித்து வருவதால், கார் ஒதுக்கீட்டு நிதியைக் கொண்டு தங்கள் தொகுதியில் நவீன நெல் கொள்முதல் நிலையங்கள் மற்றும் கிடங்குகளைக் கட்டித் தருமாறு அரசை வலியுறுத்தினார்.
ஏற்கனவே எதிர்க்கட்சித் தலைவர் உதயநிதி ஸ்டாலின் தலைமையிலான திமுக எம்.எல்.ஏ-க்கள் மற்றும் இடதுசாரி உறுப்பினர்கள் அரசு கார் வேண்டாம் என அறிவித்துள்ள நிலையில், பாமகவும் இந்த நிலைப்பாட்டை எடுத்துள்ளது. மக்கள் பிரதிநிதிகளின் ஆடம்பரச் செலவுகளைத் தவிர்த்து, அந்த நிதியை விவசாயிகளின் அத்தியாவசியத் தேவைகளுக்குப் பயன்படுத்த வேண்டும் என்ற சௌமியா அன்புமணியின் இந்தக் கோரிக்கை பொதுமக்கள் மற்றும் விவசாயிகள் மத்தியில் பெரும் வரவேற்பைப் பெற்றுள்ளது.
