இந்திய ராணுவம் தனது காலாட்படை மற்றும் எல்லையோரப் பாதுகாப்புப் படைகளைப் பலப்படுத்தும் வகையில், உலகின் முன்னணி ‘ஃபயர் அண்ட் ஃபர்கெட்’ (Fire-and-Forget) ரக எதிர்ப்புத் தவச வாகன ஏவுகணையான (Anti-Tank Guided Missile – ATGM) ‘ஜாவலின்’ (FGM-148 Javelin) ஏவுகணைகளைத் தனது படைப் பிரிவில் இணைக்கத் தீவிர நடவடிக்கைகளை மேற்கொண்டு வருகிறது. கடினமான மலைப்பகுதிகள் மற்றும் எல்லையோரக் களம் இரண்டிலும் எதிரிகளின் டாங்கிகள் மற்றும் கவச வாகனங்களை எளிதில் தகர்க்கும் திறன் கொண்டது இந்த நவீன ஆயுதம்.
அமெரிக்காவின் ரேதியான் (Raytheon) மற்றும் லாக்ஹீட் மார்ட்டின் (Lockheed Martin) நிறுவனங்களால் உருவாக்கப்பட்ட இந்த ஜாவலின் ஏவுகணை, அதன் அதிநவீன அகச்சிவப்பு வழிகாட்டுதல் தொழில்நுட்பத்தால் (Infrared Seeker) இயங்குகிறது. இந்த ஏவுகணையின் சிறப்பு என்னவென்றால், இலக்கைக் குறித்த பிறகு (Lock-on) வீரர்கள் அதை இயக்கிவிட்டால் போதும்; ஏவுகணையானது இலக்கைத் தானே பின் தொடர்ந்து சென்று தாக்கி அழிக்கும். இதனால் ஏவுகணையை ஏவிய வீரர்கள் உடனடியாகத் தங்களைப் பாதுகாப்பான இடங்களுக்கு மாற்றிக்கொள்ள முடியும் (Shoot and Scoot).
மேலும், இந்த ஏவுகணையில் ‘டாப் அட்டாக்’ (Top Attack) மற்றும் ‘டிரெக்ட் அட்டாக்’ (Direct Attack) என இரண்டு பிரத்யேகத் தாக்குதல் முறைகள் உள்ளன. டாங்கிகளின் முன்பகுதி மற்றும் பக்கவாட்டுப் பகுதிகளை விட அதன் மேல்பகுதி (Roof) எப்போதும் பலவீனமான கவசத்தைக் கொண்டிருக்கும். ஜாவலின் ஏவுகணை செங்குத்தாக மேல்நோக்கிப் பறந்து சென்று, எதிரி டாங்கிகளின் மேல்பகுதியில் நேரடியாக வீழ்ந்து தாக்கும் ‘டாப் அட்டாக்’ முறையைக் கொண்டிருப்பதால், நவீனத் தற்காப்பு அமைப்புகளைக் கொண்ட அதிநவீன டாங்கிகளாலும் இதிலிருந்து தப்பிக்க முடியாது.
இந்தியாவின் வடமேற்கு எல்லைகள் மற்றும் கரடுமுரடான இமயமலைப் பிராந்தியங்களில் எதிரிகளின் கவசப் படைகளை எதிர்கொள்ளவும், காலாட்படை வீரர்களின் தற்காப்புத் திறனை அதிகரிக்கவும் இந்த ஜாவலின் ஏவுகணைகள் பேருதவியாக இருக்கும். ஏற்கனவே அமெரிக்கா மற்றும் அதன் நட்பு நாடுகளின் ராணுவத்தில் தனக்கெனத் தனி முத்திரை பதித்துள்ள இந்த ஏவுகணை, இந்திய ராணுவத்தின் நவீனமயமாக்கல் பயணத்தில் மிக முக்கியமான ஒரு மைல்கல்லாகப் பார்க்கப்படுகிறது.
