மத்திய அரசு நடத்தவுள்ள வரவிருக்கும் மக்கள் தொகைக் கணக்கெடுப்பில் இதர பிற்படுத்தப்பட்ட வகுப்பினரின் (OBC) சாதி விவரங்களைப் பதிவு செய்ய அறிவிக்கப்பட்டுள்ள புதிய நடைமுறைக்குக் கடும் எதிர்ப்பு தெரிவித்துள்ள முன்னாள் முதலமைச்சரும் திமுக தலைவருமான மு.க.ஸ்டாலின், ஓபிசி மக்களின் சமூகநீதி உரிமைகளைப் பாதுகாக்கத் தமிழகச் சட்டமன்றக் கூட்டத்தொடரின் கடைசி இரண்டு நாட்களில் தவெக அரசு சிறப்புத் தீர்மானம் நிறைவேற்ற வேண்டும் என அதிரடியாக வலியுறுத்தியுள்ளார்.
மத்திய அரசு கொண்டுவந்துள்ள ‘Open-ended format’ எனும் தடையற்றப் பதிவு முறையானது, முன்கூட்டியே பட்டியலிடப்பட்ட சாதிப் பெயர்கள் இன்றி பொதுமக்கள் கூறுவதை அப்படியே பதிவிடும் அமைப்பாக உள்ளது. இதனால் நாடு முழுவதும் 46 லட்சத்திற்கும் அதிகமான சாதிப் பெயர்கள் உருவாகிப் பெரும் குளறுபடி ஏற்படும் எனக் சுட்டிக்காட்டியுள்ள மு.க.ஸ்டாலின், “இது ஓபிசி மக்களின் உண்மையான எண்ணிக்கையை மறைத்து, சமூகநீதியைச் சீர்குலைக்கும் ஆபத்தான முயற்சி” எனத் தனது எக்ஸ் (X) தளப் பதிவில் எச்சரித்துள்ளார்.
மத்திய, மாநில அரசுகளின் ஓபிசி பட்டியலை வைத்து அதிலிருந்து மக்கள் சாதிப் பெயரைத் தேர்வு செய்யும் முறையைப் பின்பற்றாவிட்டால், மக்கள் தொகைக் கணக்கெடுப்பிற்காகச் செலவிடப்படும் ரூ.12,000 கோடி நிதியும், லட்சக்கணக்கான அரசு ஊழியர்களின் உழைப்பும் முற்றிலும் வீணாகிவிடும் என அவர் சாடியுள்ளார். சாதிவாரி கணக்கெடுப்பின் முதன்மை நோக்கமே ஓபிசி மக்களின் கல்வி, சமூகம் மற்றும் பொருளாதார நிலையை அறிந்து அதற்கேற்ப இடஒதுக்கீட்டைச் சரியாக வகுப்பதுதான் என்பதை மத்திய அரசு உணர்ந்து செயல்பட வேண்டும் என அவர் வலியுறுத்தியுள்ளார்.
தமிழகச் சட்டப்பேரவைக் கூட்டத்தொடர் நிறைவடையும் நிலையில், கடைசி இரண்டு நாட்களில் முதலமைச்சர் சி.ஜோசப் விஜய் தலைமையிலான தவெக அரசு, தமிழ்நாட்டு மக்களின் உணர்வுகளைப் பிரதிபலிக்கும் வகையில் மத்திய அரசுக்கு அழுத்தம் கொடுக்கும் சிறப்பு கவன ஈர்ப்புத் தீர்மானத்தை உடனடியாக நிறைவேற்ற வேண்டும் என திமுக சார்பில் ஸ்டாலின் கோரிக்கை விடுத்துள்ளார். தவெக மற்றும் திமுக இடையே சட்டமன்றத்தில் காரசாரமான விவாதங்கள் நடைபெற்று வரும் சூழலில், சாதிவாரி கணக்கெடுப்பு குறித்த மு.க.ஸ்டாலினின் இந்த அதிரடி அறிக்கை தமிழக அரசியல் களத்தில் புதிய விவாதத்தைக் கிளப்பியுள்ளது.
