அமெரிக்கத் தூதுவர்களின் அமைதிப் பேச்சுவார்த்தைக்காக அறிவிக்கப்பட்ட 3 நாள் தற்காலிகப் போர்நிறுத்தம் முடிவடைந்த அடுத்த கணமே, உக்ரைன் தலைநகர் கியேவ் மீது ரஷியா மீண்டும் ஏவுகணைகள் மற்றும் ட்ரோன்களைப் பொழிந்து கொடூரத் தாக்குதலைத் தொடங்கியுள்ளது.
அமெரிக்க அதிபர் டொனால்ட் டிரம்பின் சிறப்புத் தூதுவர்களான ஸ்டீவ் விட்காஃப் மற்றும் ஜாரெட் குஷ்னர் ஆகியோர் போரை முடிவுக்குக் கொண்டுவருவது தொடர்பாக மாஸ்கோ மற்றும் கியேவ் ஆகிய நகரங்களுக்கு நேரில் சென்று பேச்சுவார்த்தை நடத்தினார்கள். இந்த உயர்மட்டப் பேச்சுவார்த்தையை முன்னிட்டு, ரஷிய அதிபர் விளாடிமிர் புடின் கியேவ் நகர் மீதான வான்வழித் தாக்குதல்களை 3 நாட்களுக்குத் தற்காலிகமாக நிறுத்தி வைப்பதாக உத்தரவிட்டிருந்தார். இந்நிலையில், அமெரிக்கத் தூதுவர்களின் அமைதிப் பேச்சுவார்த்தை முடிந்து அவர்கள் புறப்பட்ட சில மணிநேரங்களிலேயே, அறிவிக்கப்பட்ட கெடு முடிவுக்கு வந்தது.
அமைதிப் போர்நிறுத்தக் கெடு முடிந்த உடனடியாக, செவ்வாய்க்கிழமை அதிகாலை 3:30 மணியளவில் கியேவ் நகரத்தை இலக்கு வைத்து ரஷியப் படைகள் பாலிஸ்டிக் ஏவுகணைகள் மற்றும் தாக்குதல் ட்ரோன்களைத் தொடர்ச்சியாக ஏவத் தொடங்கின. தலைநகரின் சோலோமியான்ஸ்கி மற்றும் தார்னிட்ஸ்கி ஆகிய குடியிருப்புப் பகுதிகளில் அடுத்தடுத்து குறைந்தது 5 சக்திவாய்ந்த குண்டுவெடிப்புகள் நிகழ்ந்தன. இந்தத் திடீர் வான்வழித் தாக்குதலால் பல அடுக்குமாடிக் குடியிருப்புகள், வணிக வளாகங்கள் மற்றும் வாகனங்கள் பலத்த சேதமடைந்துள்ளதுடன், நகர் முழுவதும் தீப்பற்றி எரியும் புகைக் மண்டலங்கள் சூழ்ந்துள்ளன.
கியேவ் நகர ராணுவ நிர்வாகம் உடனடியாக நகர் முழுவதும் விமானத் தாக்குதல் எச்சரிக்கை மணி அடித்து, பொதுமக்களைப் பாதாளப் பாதுகாப்புப் புகலிடங்களுக்குச் செல்லுமாறு அவசர உத்தரவு பிறப்பித்துள்ளது. அமெரிக்க அமைதித் தூதுவர்களின் வருகை தற்காலிகப் பலனைத் தந்தபோதிலும், அவர்கள் புறப்பட்ட மறுக்கணமே ரஷியா மீண்டும் தாக்குதலைத் தீவிரப்படுத்தியுள்ளது உக்ரைன் மற்றும் சர்வதேச நாடுகளிடையே பெரும் அதிர்ச்சியையும் கவலையையும் ஏற்படுத்தியுள்ளது.
