பிரிட்டனின் போர்ட்ஸ்மத் (Portsmouth) நகர்க் கடற்கரைக்குக் சிறிய ரப்பர் படகு மூலம் சுமார் 140 அகதிகள் வந்திறங்கியதைத் தொடர்ந்து, அவர்களுக்கு எதிராகத் திரண்ட தீவிர வலதுசாரி ஆர்ப்பாட்டக்காரர்கள் காவல்துறையினர் மீது கற்களை வீசித் தாக்குதல் நடத்திய சம்பவம் பேரதிர்ச்சியை ஏற்படுத்தியுள்ளது.
பிரான்ஸிலிருந்து இங்கிலாந்து இடுக்குக் கடல் வழியே தோவர் (Dover) துறைமுகப் பகுதிக்கு வழக்கமாக வரும் அகதிகள், இம்முறை கண்காணிப்புகளிலிருந்து தப்பிக்க போர்ட்ஸ்மத்தின் ஈஸ்ட்னி (Eastney) கடற்கரையை அடைந்துள்ளனர். தகவலறிந்து அங்கு திரண்ட 200-க்கும் மேற்பட்ட முகமூடி அணிந்த போராட்டக்காரர்கள், அகதிகளை ஏற்றிச் செல்ல வந்த பேருந்துகளை வழிமறித்து வீதிகளை முடக்கினர். அவர்களைக் கலைக்க முயன்ற கலவரத் தடுப்புக் காவல்துறையினர் மீது ஆர்ப்பாட்டக்காரர்கள் கற்கள் மற்றும் பாட்டில்களை வீசி வன்முறையில் ஈடுபட்டனர்.
காவல்துறையினர் கேடயங்களைப் பயன்படுத்தி வன்முறையாளர்களைப் பின்னுக்குத் தள்ளியதுடன், அப்பகுதியில் நடமாட்டத் தடை உத்தரவையும் பிறப்பித்தனர். இச்சம்பவத்திற்குக் கடும் கண்டனம் தெரிவித்துள்ள பிரிட்டிஷ் உள்துறை மற்றும் நிதியமைச்சகம், “போராட்டம் நடத்தும் உரிமையைத் தாண்டி இத்தகைய சண்டைக் குணமும் அச்சுறுத்தலும் கொண்ட வன்முறையை ஒருபோதும் சகிக்க முடியாது” என எச்சரித்துள்ளது.
தோவர் மற்றும் போர்ட்ஸ்மத் பகுதிகளில் அடுத்தடுத்து தீவிரமடைந்து வரும் அகதிகள் எதிர்ப்புப் போராட்டங்கள் பிரிட்டன் அரசின் எல்லைப் பாதுகாப்பு நடைமுறைகளுக்குப் பெரும் சவாலாக உருவெடுத்துள்ளன. கடத்தல் கும்பல்கள் புதிய வழிகளைக் கண்டறிந்து அகதிகளை அனுப்பி வரும் நிலையில், உள்நாட்டுப் பாதுகாப்பைப் பலப்படுத்தக் கோரி வன்முறைச் சம்பவங்கள் அதிகரித்து வருவது பிரிட்டன் அரசியல் களத்தில் பெரும் பதற்றத்தை உருவாக்கியுள்ளது.
