கடந்த திமுக ஆட்சிக் காலத்தில் மீண்டும் தாங்களே ஆட்சிக்கு வந்துவிடுவோம் என்ற அசைக்க முடியாத நம்பிக்கையில், நெடுஞ்சாலைத் துறை சார்பில் ரூ.2,000 கோடி மதிப்பிலான திட்டங்களுக்கு முன்னதாகவே நிதி ஒதுக்கி அரசாணை பிறப்பிக்கப்பட்டதாக தவெக அரசைச் சேர்ந்த பொதுப்பணி மற்றும் விளையாட்டுத் துறை அமைச்சர் ஆதவ் அர்ஜுனா சட்டப்பேரவையில் பரபரப்பான குற்றச்சாட்டை முன்வைத்துள்ளார்.
சட்டமன்றத்தில் நெடுஞ்சாலைகள் மற்றும் பொதுப்பணித்துறை மானியக் கோரிக்கை மீதான விவாதத்தில் உரையாற்றிய அமைச்சர் ஆதவ் அர்ஜுனா, முன்னாள் நெடுஞ்சாலைத்துறை அமைச்சரும் திமுக மூத்த தலைவருமான எ.வ. வேலுவின் செயல்பாடுகளைக் கடுமையாகச் சாடினார். 2026-2027 நிதியாண்டிற்கான முதலமைச்சரின் சாலை மேம்பாட்டுத் திட்டத்தின் (CRIDP) கீழ் சுமார் 80 பெரிய பணிகளுக்காக ரூ.2,000 கோடி நிதி ஒதுக்கீடு செய்யப்பட்ட விவகாரத்தைச் சுட்டிக்காட்டிய அவர், தேர்தல் நெருங்கிய வேளையில் எவ்வித நிதிநிலை ஆய்வுகளும் இன்றி அவசர அவசரமாக இந்தத் திட்டங்கள் அனுமதிக்கப்பட்டதாகத் தெரிவித்தார்.
“மீண்டும் தாங்களே ஆட்சியமைப்போம் என்ற மிதப்பில் எ.வ. வேலு இந்த அரசாணைகளை வெளியிட்டார்; ஆனால் மக்கள் தவெகவிற்கு வாக்களித்து ஆட்சியில் அமர வைத்துள்ளனர்” எனக் குறிப்பிட்ட ஆதவ் அர்ஜுனா, விதிமுறைகளை மீறி ஒதுக்கப்பட்ட இந்த நிதி ஒதுக்கீடு குறித்துத் துறை ரீதியான விசாரணைகள் முடுக்கிவிடப்பட்டுள்ளதாக உறுதி அளித்தார். மேலும், பேரவையில் தவறான மற்றும் முன்னுக்குப் பின் முரணான தகவல்களைத் தந்து அவையைத் திசைதிருப்ப முயன்றதாகக் கூறி எ.வ. வேலுவுக்கு எதிராக உரிமை மீறல் பிரச்சினையையும் (Breach of Privilege) அவர் கிளப்பினார்.
திமுக சார்பில் அவையில் வீற்றிருந்த எதிர்க்கட்சி உறுப்பினர்கள் இதற்கு உடனடியாகக் கடும் எதிர்ப்பு தெரிவித்து அமளியில் ஈடுபட்டனர். இருப்பினும், கடந்த கால நிர்வாகச் சீர்கேடுகள் மற்றும் அவசர நிதி ஒதுக்கீடுகள் அனைத்தும் முழுமையாகத் தணிக்கை செய்யப்பட்டு உரிய நடவடிக்கைகள் எடுக்கப்படும் என்று தவெக தரப்பில் திட்டவட்டமாகப் பதிலளிக்கப்பட்டதால், சட்டப்பேரவையில் இரு கட்சிகளுக்கும் இடையே கடும் காரசாரமான விவாதம் மூண்டது.
