தனியார் பள்ளிகளுக்கு அங்கீகாரம் வழங்குவதில் ரூ.100 கோடி லஞ்சம் பெற்றதாகத் தொடரப்பட்ட வழக்கில் முன்னாள் அமைச்சர் அன்பில் மகேஷ் அண்மையில் கைது செய்யப்பட்டுப் புழல் சிறையில் அடைக்கப்பட்டார். இந்த வழக்கின் தொடர் விசாரணையில், பிடி அரசகுமாரன் மற்றும் முத்துக்குமார் ஆகியோரின் பின்னணி குறித்து மத்திய குற்றப்பிரிவு காவல்துறையினர் தீவிர விசாரணை மேற்கொண்டு வந்தனர். இந்நிலையில், உமாசங்கர் என்ற ஓட்டுநரிடம் நடத்திய விசாரணையின் போது, ‘ஆப்ரோடைட் டிரேப்ஸ்’ (Aphrodite Drapes) என்ற துணிக்கடை நடத்தி வரும் தொழிலதிபர் சண்முகபிரியா குறித்த முக்கியத் தகவல்கள் காவல்துறையினருக்குக் கிடைத்தன.
ஓட்டுநர் உமாசங்கர் அளித்த வாக்குமூலத்தின் அடிப்படையில், சென்னை பெருங்குடியில் உள்ள சண்முகபிரியாவின் இல்லம் மற்றும் ராம்ஸ் ராக ஸ்ரீ விலாஸ் அடுக்குமாடிக் குடியிருப்பில் மத்திய குற்றப்பிரிவு போலீசார் அதிரடிச் சோதனையில் ஈடுபட்டு வருகின்றனர். அக்டோபர் 15-ஆம் தேதி முதல் நீலாங்கரை மற்றும் பெருங்குடி உள்ளிட்ட 4 இடங்களில் இவரைப் பற்றிய தீவிரக் கண்காணிப்பில் போலீசார் ஈடுபட்டு வந்த நிலையில் இந்தச் சோதனை நடைபெற்று வருகிறது. இந்த வழக்கில் கைமாறியதாகக் கூறப்படும் பணம் மற்றும் மின்னணு ஆதாரங்களை கைப்பற்றும் நோக்கில் விசாரணை அதிகாரிகள் இந்த நடவடிக்கையை முடுக்கிவிட்டுள்ளனர்.
இந்த வழக்கில் கூடுதல் நபர்களின் பெயர்கள் சேர்க்கப்பட்டு வருவதால், வழக்கின் போக்கு புதிய திருப்பத்தை எட்டியுள்ளதாகக் காவல்துறை தரப்பில் தெரிவிக்கப்பட்டுள்ளது. துணிக்கடை அதிபரான சண்முகபிரியாவின் பின்னணி மற்றும் அவருக்கு இந்த லஞ்ச விவகாரத்தில் உள்ள தொடர்பு குறித்து அதிகாரிகள் தீவிரமாக ஆராய்ந்து வருகின்றனர்.
சண்முகபிரியா வீடுகளில் நடைபெற்று வரும் சோதனை முடிவடைந்த பிறகு, அவரிடம் காவல்துறை விசாரணை நடத்தவும் அல்லது சம்மன் அனுப்பி அழைக்கவும் வாய்ப்புள்ளதாகத் தெரிகிறது.
அன்பில் மகேஷின் மூன்றாவது நாள் காவலில் விசாரணை மற்றும் முன்ஜாமீன் விவகாரங்கள் அடுத்தடுத்த கட்டங்களுக்கு நகரவுள்ளதால் நீதிமன்ற நடவடிக்கைகளும் தீவிரமடைந்துள்ளன.
