தமிழக அரசியல் களத்தில் மிகவும் செல்வாக்கு மிக்க தலைவர்களில் ஒருவரான முன்னாள் அமைச்சர் டி.ஜெயக்குமாரின் ராயபுரம் கோட்டையை, தமிழக வெற்றிக் கழகத்தைச் சேர்ந்த ஒரு சாதாரண ஆட்டோ ஓட்டுநர் தகர்த்தெறிந்துள்ளார். தவெக வேட்பாளராகப் போட்டியிட்ட ‘விஜய் தாமு’ என்று அழைக்கப்படும் தாமோதரன், சுமார் 10,000-க்கும் அதிகமான வாக்குகள் வித்தியாசத்தில் ஜெயக்குமாரை வீழ்த்தி வெற்றி வாகை சூடியுள்ளார். ராயபுரம் தொகுதியில் பலமுறை வெற்றி பெற்று, அப்பகுதியின் அசைக்க முடியாத சக்தியாகக் கருதப்பட்ட ஜெயக்குமாரின் இந்தத் தோல்வி, அரசியல் வட்டாரங்களில் மிகப்பெரிய அதிர்ச்சியை ஏற்படுத்தியுள்ளது.
யார் இந்த விஜய் தாமு? ராயபுரம் பகுதியிலேயே பிறந்து வளர்ந்த தாமோதரன், கடந்த 20 ஆண்டுகளுக்கும் மேலாக ஆட்டோ ஓட்டி வருபவர். விஜய் ரசிகர் மன்றத்தில் தீவிரமாக இயங்கி வந்த இவருக்கு, ராயபுரம் தொகுதியில் போட்டியிட நடிகர் விஜய் வாய்ப்பளித்தார். “மக்களில் ஒருவன், மக்களுக்காக உழைப்பேன்” என்ற எளிய முழக்கத்துடன் தேர்தலைச் சந்தித்த இவருக்கு, ராயபுரம் பகுதி மக்கள் அமோக ஆதரவை வழங்கியுள்ளனர். குறிப்பாக, அடித்தட்டு மக்களின் தேவைகளை நன்கு அறிந்த ஒரு சாமானியர் சட்டமன்றத்திற்குச் செல்ல வேண்டும் என்ற மக்களின் விருப்பமே இந்த வெற்றிக்கு முக்கியக் காரணமாக அமைந்துள்ளது.
தேர்தல் பிரச்சாரத்தின் போது, தனது ஆட்டோவிலேயே தொகுதி முழுவதும் சுற்றி வந்து வாக்குச் சேகரித்த விஜய் தாமுவின் எளிமை அனைவரையும் கவர்ந்தது. ஒருபுறம் பணபலம் மற்றும் அதிகார பலத்துடன் திமுக மற்றும் அதிமுக வேட்பாளர்கள் களம் கண்ட நிலையில், எந்தவித ஆடம்பரமும் இன்றி உழைப்பை மட்டுமே நம்பி நின்ற விஜய் தாமுவிற்கு இளைஞர்களும், பெண்களும் பெருவாரியாக வாக்களித்துள்ளனர். “எங்கள் பகுதியைச் சேர்ந்த ஒரு ஆட்டோ அண்ணா எம்.எல்.ஏ ஆகியிருப்பது எங்களுக்குப் பெருமையாக இருக்கிறது” என்று ராயபுரம் பகுதி மக்கள் நெகிழ்ச்சியுடன் தெரிவித்து வருகின்றனர்.
தற்போதைய நிலவரப்படி, ராயபுரம் தொகுதியின் அதிகாரப்பூர்வ வெற்றிச் சான்றிதழை விஜய் தாமு பெற்றுள்ளார். தனது வெற்றியைத் தொடர்ந்து அவர் கூறுகையில், “இந்த வெற்றி எனது தலைவன் விஜய்க்கும், என் ராயபுரம் மக்களுக்கும் சமர்ப்பணம். ஆட்டோ ஓட்டுநராக மக்களின் வலிகளை உணர்ந்த நான், இனி சட்டமன்றத்தில் அவர்களின் குரலாக ஒலிப்பேன்” என்று உருக்கமாகத் தெரிவித்தார். ஒரு சாதாரணத் தொண்டனைச் சட்டமன்ற உறுப்பினராக்கி அழகு பார்த்த விஜய்யின் அரசியல் வியூகம், ராயபுரத்தில் மிகச் சரியாக வேலை செய்துள்ளதாக அரசியல் விமர்சகர்கள் கருத்து தெரிவித்துள்ளனர்.
