அமெரிக்க அதிபர் டொனால்ட் ட்ரம்ப் முன்வைத்த அமைதி உடன்படிக்கையின் நிபந்தனைகளை ஈரான் திட்டவட்டமாக நிராகரித்துள்ளது. ஈரானின் வெளியுறவுத்துறை அமைச்சக செய்தித் தொடர்பாளர் இஸ்மாயில் பாகேகி இது குறித்துக் கூறுகையில், “நாங்கள் யாரையும் போருக்கு அழைக்கவில்லை, ஆனால் எங்களை யாராவது போருக்குக் கட்டாயப்படுத்தினால், எங்களது இறையாண்மையைப் பாதுகாக்க இறுதிவரை போரிடுவோம்” என அதிரடியாகத் தெரிவித்துள்ளார்.
முன்னதாக, பாகிஸ்தான் தூதர்கள் வழியாக ஈரான் அனுப்பிய பதில் மனுவை அமெரிக்க அதிபர் ட்ரம்ப் “முற்றிலும் ஏற்றுக்கொள்ள முடியாதது” (Totally Unacceptable) என்று தனது சமூக வலைதள பக்கத்தில் விமர்சித்திருந்தார். ஈரானின் சொத்துக்களை விடுவித்தல், பொருளாதாரத் தடைகளை நீக்குதல் மற்றும் ஹார்முஸ் ஜலசந்தியில் ஈரானின் அதிகாரத்தை அங்கீகரித்தல் போன்ற கோரிக்கைகளை ட்ரம்ப் நிராகரித்ததே இந்த மோதலுக்கு முக்கிய காரணமாகும்.
இந்த மோதலால் உலக சந்தையில் கச்சா எண்ணெய் விலை கடுமையாக உயர்ந்துள்ளது. ஈரான் தனது ஹார்முஸ் ஜலசந்தியை மூடுவதாக அச்சுறுத்தி வருவதால், சர்வதேச எரிசக்தி விநியோகம் பாதிக்கப்படும் என்ற அச்சம் எழுந்துள்ளது. இதற்கிடையில், இஸ்ரேல் பிரதமர் பெஞ்சமின் நெதன்யாகுவும், ஈரானின் அணுசக்தி மையங்கள் முழுமையாக அழிக்கப்படும் வரை போர் ஓயாது என்று கூறி நிலைமையை மேலும் தீவிரப்படுத்தியுள்ளார்.
தற்போது இரு நாடுகளுக்கும் இடையே நிலவி வரும் போர் நிறுத்த ஒப்பந்தம் எப்போது வேண்டுமானாலும் முறியலாம் என்ற சூழல் உருவாகியுள்ளது. அமெரிக்கா தனது கடற்படை முற்றுகையைத் தீவிரப்படுத்தி வரும் நிலையில், ஈரானும் தனது ஏவுகணைத் தாக்குதல்களுக்குத் தயாராகி வருவதாகத் தகவல்கள் தெரிவிக்கின்றன. சர்வதேச நாடுகள் இந்த விவகாரத்தில் தலையிட்டு அமைதியை நிலைநாட்ட முயற்சி செய்து வருகின்றன.
