கனடாவின் பிரிட்டிஷ் கொலம்பியா (British Columbia) மாகாணத்தில் காட்டுத்தீ மிக வேகமாகப் பரவி வருவதைத் தொடர்ந்து, அம்மாநில அரசு உடனடியாக அவசரநிலையைப் பிரகடனம் செய்துள்ளது. ஓகானகன் ஏரி (Okanagan Lake) கரையோரம் அமைந்துள்ள சம்மர்லேண்ட் மற்றும் பீச்லேண்ட் உள்ளிட்ட நகரங்களில் தீயின் சீற்றம் தீவிரமடைந்துள்ளதால், 20,000-க்கும் மேற்பட்ட பொதுமக்கள் தங்கள் வீடுகளை விட்டு அவசர அவசரமாக வெளியேற்றப்பட்டுப் பாதுகாப்பான இடங்களுக்கு அழைத்துச் செல்லப்பட்டுள்ளனர்.
மாகாண முதல்வர் டேவிட் ஈபி (David Eby) செய்தியாளர்களிடம் பேசுகையில், “காட்டுத்தீயின் சீற்றம் ஒரு அணுகுண்டு வெடித்ததைப் போல மிகவும் பயங்கரமாக உள்ளது” என்று தீயணைப்பு அதிகாரி ஒருவர் விவரித்ததாகக் கூறினார். 100 அடி உயர மரங்களில் பற்றிய தீ மேலும் 200 அடிகளுக்கு மேல் எழும்பி, தனது சொந்த வானிலை அமைப்பை (Weather System) உருவாக்கி மின்னலையும் வீசச் செய்வதால் தீயணைப்புப் பணிகள் பெரும் சவாலாக மாறியுள்ளதாக அவர் கவலையுடன் தெரிவித்தார்.
வெள்ளிக்கிழமை மாலை தொடங்கப்பட்ட ‘பால்ட் ரேஞ்ச்’ (Bald Range) காட்டுத்தீ, சில மணி நேரங்களிலேயே சுமார் 9,500 ஹெக்டேர் (23,500 ஏக்கர்) பரப்பளவிற்குப் பரவி பல வீடுகளையும் சொத்துக்களையும் சாம்பலாக்கியுள்ளது. சாலையில் இருபுறமும் தீப்பிடித்து எரிந்ததால் சிக்கிக்கொண்ட மக்களை மீட்புக் குழுவினர் ஹெலிகாப்டர்கள் மூலம் மீட்டுள்ளனர். மேலும், காட்டுத்தீ சூழ்ந்த பகுதியில் ஒருவர் உயிரிழந்திருக்கக் கூடும் என்றும் காவல்துறை விசாரணை நடத்தி வருகிறது.
பிரிட்டிஷ் கொலம்பியா மாகாணம் முழுவதும் தற்போது 100-க்கும் மேற்பட்ட காட்டுத்தீ சம்பவங்கள் தீவிரமாக எரிந்து வருகின்றன. கோடைகால வெப்ப அலை மற்றும் பலத்த காற்று காரணமாகத் தீயின் தீவிரம் தொடர்ந்து அதிகரித்து வருவதால், அப்பகுதியில் மின்சார விநியோகம் துண்டிக்கப்பட்டு, குடிநீரைப் கொதிக்க வைத்துப் பயன்படுத்துமாறு எச்சரிக்கையும் விடுக்கப்பட்டுள்ளது.
