தமிழ்நாட்டின் தொழில்நகரமான கோயம்புத்தூரின் பொருளாதார வளர்ச்சியை அடுத்தகட்டத்திற்கு எடுத்துச் செல்லும் வகையில், ரூ.400 கோடி மதிப்பீட்டில் பிரம்மாண்ட ‘டிஜிட்டல் நிதி மையம்’ (Digital Finance Hub) அமைக்கப்படும் என்று தமிழ்நாடு முதலமைச்சர் அறிவித்துள்ளார். தமிழ்நாடு தொழில் வளர்ச்சி நிறுவனம் (TIDCO) மூலம் உருவாக்கப்படவுள்ள இந்த அறிவிப்புக்குக் கவுண்டம்பாளையம் தொகுதி சட்டமன்ற உறுப்பினரான கனிமொழி சந்தோஷ் (தவெக) தனது மனமார்ந்த வரவேற்பைத் தெரிவித்துள்ளார்.
இந்த புதிய டிஜிட்டல் நிதி மையமானது உலகத் தரத்திலான அலுவலக வசதிகள், புதிய புத்தொழில் (Start-up) நிறுவனங்களுக்கான உள்கட்டமைப்புகள், நவீன ஆராய்ச்சி மற்றும் ஆய்வக வசதிகள், மற்றும் திறன் மேம்பாட்டுப் பயிற்சி மையங்கள் உள்ளிட்ட பல்வேறு வசதிகளுடன் அமைக்கப்படவுள்ளது. நிதிநுட்பத் துறையில் (Fintech) புதிய கண்டுபிடிப்புகளை ஊக்குவிக்கவும், பன்னாட்டு நிறுவனங்களின் முதலீடுகளைக் கோவைக்கு ஈர்க்கவும் இத்திட்டம் மிகப்பெரிய திருப்புமுனையாக அமையும் என எதிர்பார்க்கப்படுகிறது.
இத்திட்டம் குறித்து மகிழ்ச்சி தெரிவித்துள்ள எம்.எல்.ஏ கனிமொழி சந்தோஷ், “தொழில் மற்றும் தகவல் தொழில்நுட்பத் துறையில் ஏற்கனவே முன்னணி நகரமாகத் திகழும் கோயம்புத்தூர், இந்த மையத்தின் மூலம் இந்தியாவின் முக்கிய நிதிநுட்ப மையங்களில் ஒன்றாக உயரும்” என்று குறிப்பிட்டுள்ளார். மேலும், கோவை மாவட்ட இளைஞர்களுக்கு உயர்தரமான வேலைவாய்ப்புகளை உருவாக்கித் தரும் இச்சிறப்பான திட்டத்தை அறிவித்த முதலமைச்சருக்கும் தமிழக அரசுக்கும் தொகுதி மக்களின் சார்பில் நன்றியைப் பதிவு செய்துள்ளார்.
மேற்கு மண்டலப் பகுதியின் தொழில் கட்டமைப்பை நவீனமயமாக்கவும், எதிர்காலத் தலைமுறையினருக்குப் புதிய பொருளாதார மற்றும் தொழில்முனைவு வாய்ப்புகளை வழங்கவும் இந்த ரூ.400 கோடி திட்டம் பெரும் உதவியாக இருக்கும் என்பதால் கோவை மக்கள் மற்றும் தொழில்முனைவோரிடையே இச்செய்தி மிகுந்த உற்சாகத்தை ஏற்படுத்தியுள்ளது.
