தென் அமெரிக்க நாடான கொலம்பியாவின் மேற்குப் பகுதியில் ஆகஸ்ட் 10 அன்று காலை 7:34 மணிக்கு 7.4 ரிக்டர் அளவில் சக்திவாய்ந்த பயங்கர நிலநடுக்கம் தாக்கியதில், இதுவரை 47 உயிரிழப்புகள் பதிவாகியுள்ளன. சோகோ (Chocó) பிராந்தியத்தில் உள்ள சான் ஜோஸ் டெல் பால்மர் (San José del Palmar) பகுதிக்கு அருகே பூமியிலிருந்து 107 கிலோமீட்டர் ஆழத்தில் இந்த நிலநடுக்கத்தின் மையம் அமைந்திருந்ததாக அமெரிக்கப் புவியியல் ஆய்வு மையம் (USGS) தெரிவித்துள்ளது.
இந்த நிலநடுக்கத்தின் காரணமாகப் பெரெய்ரா (Pereira), காலி (Cali), மனீசாலேஸ் (Manizales) உள்ளிட்ட பல்வேறு முக்கிய நகரங்களில் ஏராளமான கட்டடங்கள் நொடிப்பொழுதில் இடிந்து தரைமட்டமாகின. பெரெய்ரா நகரில் மட்டும் 18 பேரும், வாலே டெல் காவ்கா பிராந்தியத்தில் 27 பேரும் உயிரிழந்துள்ளனர். தலைநகர் போகோடா வரை அதிர்வுகள் மிகக் கடுமையாக உணரப்பட்டதால், ஆயிரக்கணக்கான பொதுமக்கள் அச்சத்தில் வீடுகள் மற்றும் கட்டடங்களை விட்டு வெளியேறிச் சாலைகளில் தஞ்சம் அடைந்தனர்.
நிலநடுக்கத்தைத் தொடர்ந்து பலமுறை நில அதிர்வுகள் (Aftershocks) ஏற்பட்டதால், இடிபாடுகளுக்குள் பலர் சிக்கியிருக்கக் கூடும் எனக் அஞ்சப்படுகிறது. மீட்புக் குழுவினர் மற்றும் காவல் துறையினர் சம்பவ இடங்களில் முகாமிட்டு இடிபாடுகளை அகற்றி, மீட்புப் பணிகளை அதிவேகமாக முடுக்கிவிட்டுள்ளனர். மேலும், முன்னெச்சரிக்கை நடவடிக்கையாக அப்பகுதியில் உள்ள 7 விமான நிலையங்களின் சேவைகள் தற்காலிகமாக நிறுத்தப்பட்டுள்ளன.
கொலம்பியாவின் புதிய அதிபர் அபெலார்டோ டி லா எஸ்ப்ரியெல்லா (Abelardo de la Espriella) நிலநடுக்கப் பாதிப்பு குறித்து அவசர ஆய்வு மேற்கொண்டு, “கடினமான சூழலில் இருக்கும் மக்களுக்கு அரசு அனைத்து உதவிகளையும் செய்யும், நீங்கள் தனித்து இல்லை” என உறுதியளித்துள்ளார். அண்டை நாடுகளான ஈக்வடார் மற்றும் பனாமாவிலும் இந்த நிலநடுக்கத்தின் அதிர்வுகள் உணரப்பட்டதால் அப்பகுதியிலும் பெரும் பரபரப்பு நிலவுகிறது.
