தமிழக முதலமைச்சரும், தமிழக வெற்றிக் கழகத்தின் (தவெக) தலைவருமான சி. ஜோசப் விஜய் மற்றும் அவரது மனைவி சங்கீதா சொர்ணலிங்கம் ஆகியோருக்கு இடையேயான விவாகரத்து வழக்கு செங்கல்பட்டு குடும்ப நல நீதிமன்றத்தில் நிலுவையில் இருந்து வரும் சூழலில், தற்பொழுது இருவரும் மீண்டும் இணைந்து வாழ முடிவு செய்துள்ளதாக அரசியல் மற்றும் திரையுலக வட்டாரங்களில் புதிய தகவல் ஒன்று வெளியாகி காட்டுத்தீயாய் பரவி வருகிறது. கடந்த பிப்ரவரி மாதம் சங்கீதா தரப்பில் தாக்கல் செய்யப்பட்ட விவாகரத்து மனு, தமிழக அரசியல் களத்தில் மிகப்பெரிய அதிர்வலைகளை ஏற்படுத்தியிருந்தது குறிப்பிடத்தக்கது.
26 ஆண்டுகள் திருமண வாழ்க்கைக்குப் பிறகு, கடந்த 2021-ஆம் ஆண்டு முதல் தங்களுக்குள் ஏற்பட்ட கருத்து வேறுபாடுகள் மற்றும் சில மனக்கசப்புகள் காரணமாக இருவரும் பிரிந்து வாழ்ந்து வருவதாக நீதிமன்றத்தில் மனுத் தாக்கல் செய்யப்பட்டிருந்தது. பரஸ்பர ஒப்புதல் இன்றி தாக்கல் செய்யப்பட்ட இந்த வழக்கின் முந்தைய விசாரணைகளின் போது, இரு தரப்பு வழக்கறிஞர்களும் நீதிமன்றத்தில் ஆஜராகி தங்களது வாதங்களை முன்வைத்தனர். மேலும், தேர்தல் மற்றும் பாதுகாப்பு காரணங்களால் இருவரும் நேரில் ஆஜராவதில் இருந்து விலக்கு அளிக்கப்பட்டு, ஜூன் 15-ஆம் தேதிக்கு (திங்கட்கிழமை) அடுத்த விசாரணை ஒத்திவைக்கப்பட்டிருந்தது.
இந்நிலையில், ஜூன் 15-ஆம் தேதி வரவிருக்கும் முக்கிய நீதிமன்ற விசாரணைக்கு முன்னதாக, இரு குடும்பத்தைச் சேர்ந்த மூத்த நிர்வாகிகளும், நெருங்கிய நண்பர்களும் இணைந்து நடத்திய சமரசப் பேச்சுவார்த்தை (Mediation) ஓரளவுக்குக் கைகொடுத்துள்ளதாகக் கூறப்படுகிறது. தங்கள் பிள்ளைகளான ஜேசன் சஞ்சய் மற்றும் திவ்யா சாஷா ஆகியோரின் எதிர்கால நலனைக் கருத்தில் கொண்டும், முதலமைச்சரின் தற்போதைய அரசியல் அந்தஸ்தைக் கருத்தில் கொண்டும், இந்த விவாகரத்து முடிவை முழுமையாகக் கைவிட்டுவிட்டு, மீண்டும் சுமுகமாக இணைந்து வாழ இருவரும் சம்மதம் தெரிவித்துள்ளதாக நம்பத்தகுந்த வட்டாரங்கள் தெரிவிக்கின்றன.
எனினும், நீதிமன்றத்தில் தற்பொழுது நிலுவையில் உள்ள வழக்கில் ஜூன் 15 அன்று இரு தரப்பு வழக்கறிஞர்களும் என்ன மாதிரியான இறுதி மனுவைத் தாக்கல் செய்யப் போகிறார்கள் என்பதைப் பொறுத்தே இந்தத் தகவல் அதிகாரப்பூர்வமாக உறுதி செய்யப்படும். ஒருவேளை இருவருக்குள்ளும் சுமுக உடன்பாடு எட்டப்பட்டிருந்தால், வழக்கை வாபஸ் பெறுவதற்கான கூட்டு மனுவை அவர்கள் தாக்கல் செய்ய வாய்ப்புள்ளது. இதனால், ஒட்டுமொத்த தமிழகத்தின் பார்வையும் தற்போது செங்கல்பட்டு குடும்ப நல நீதிமன்றத்தின் மீதே திரும்பியுள்ளது.
