அமெரிக்க அதிபர் டொனால்ட் டிரம்ப் (Donald Trump), ஈரான் அரசுடன் தற்போது நடைபெற்று வரும் அமைதிப் பேச்சுவார்த்தைகள் மிகவும் “சிறப்பாகவும் சாதகமாகவும்” (Proceeding nicely) நகர்ந்து வருவதாகப் பகிரங்கமாக அறிவித்துள்ளார். தனது சமூக வலைதளப் பக்கமான ‘ட்ரூத் சோஷியல்’ (Truth Social) தளத்தில் நீண்ட பதிவு ஒன்றை வெளியிட்டுள்ள அவர், ஈரானுடன் எட்டப்படவுள்ள வரலாற்றுச் சிறப்புமிக்க இந்த அமைதி ஒப்பந்தமானது, மத்திய கிழக்கு பிராந்தியத்தில் உள்ள பிற இஸ்லாமிய நாடுகள் இஸ்ரேலுடன் தங்களது உறவை அதிகாரப்பூர்வமாக நிலைநிறுத்துவதைப் பொறுத்தே அமையும் என ஒரு புதிய புவி அரசியல் நிபந்தனையை விதித்துள்ளார்.
இந்த மெகா ஒப்பந்தத்தின் ஒரு பகுதியாக, ஈரானுடன் பேச்சுவார்த்தையில் ஈடுபட்டுள்ள சவூதி அரேபியா, கத்தார், பாகிஸ்தான், துருக்கி, எகிப்து, ஜோர்டான் மற்றும் பஹ்ரைன் ஆகிய நாடுகள் இஸ்ரேலுடன் தூதரக உறவை ஏற்படுத்தும் ‘ஆபிரகாம் உடன்படிக்கையில்’ (Abraham Accords) உடனடியாகக் கையெழுத்திடுவது கட்டாயமாக்கப்பட வேண்டும் (Mandatory) என்று டிரம்ப் வலியுறுத்தியுள்ளார். கடந்த சனிக்கிழமை அன்று சவூதி இளவரசர் முகமது பின் சல்மான் உள்ளிட்ட பல இஸ்லாமிய நாட்டுத் தலைவர்களுடன் நடத்திய உயர்மட்டத் தொலைபேசி உரையாடலின் போது இந்த அதிரடித் திட்டத்தை தான் முன்வைத்ததாக டிரம்ப் குறிப்பிட்டுள்ளார். இந்தத் திடீர் திட்டத்தினால் பல நாட்டுத் தலைவர்கள் சற்று அதிர்ச்சியடைந்ததாகவும் கூறப்படுகிறது.
கடந்த 2020-ஆம் ஆண்டு டிரம்பின் முதல் அதிபர் பதவிக் காலத்தில், இஸ்ரேலுக்கும் அரபு நாடுகளுக்கும் இடையே அமைதியை ஏற்படுத்த இந்த ஆபிரகாம் உடன்படிக்கை கொண்டுவரப்பட்டது என்பது குறிப்பிடத்தக்கது. தற்போது, அமெரிக்கா மற்றும் இஸ்ரேலுடன் போரில் ஈடுபட்டுள்ள ஈரான் நாடே எதிர்காலத்தில் வாஷிங்டனுடன் முறையான அணுசக்தி ஒப்பந்தத்தை முடித்துக் கொண்டால், அவற்றுடன் சேர்த்து ஈரானையும் இந்த ஆபிரகாம் உடன்படிக்கை கூட்டமைப்பில் ஒரு உறுப்பினராக இணைத்துக் கொள்ளத் தான் தயாராக இருப்பதாக டிரம்ப் மிக வியப்பூட்டும் வகையில் தெரிவித்துள்ளார். “ஈரான் போன்ற ஒரு பெரிய தேசத்தை இந்த உலகளாவிய அமைதி உடன்படிக்கையில் வரவேற்பது ஒட்டுமொத்த உலகிற்கே ஒரு பெருமையாகும்” என்றும் அவர் கூறியுள்ளார்
ஒருவேளை இந்த உடன்படிக்கையில் கையெழுத்திட இஸ்லாமிய நாடுகள் மறுத்தால், அது அவர்களின் மோசமான எண்ணத்தையே காட்டும் என்றும், ஈரானுடனான ஒட்டுமொத்த அமைதிப் பேச்சுவார்த்தையும் முறிந்து பிராந்தியம் மீண்டும் ஒரு மிகப்பெரிய போர்க்களமாக மாறும் என்றும் டிரம்ப் எச்சரித்துள்ளார். டிரம்பின் இந்த அதிரடி ராஜதந்திர நகர்வு வெற்றிபெற்றால், அது மத்திய கிழக்கு பிராந்தியத்தை வரலாற்றிலேயே இல்லாத அளவிற்கு ஒரு சக்திவாய்ந்த மற்றும் பொருளாதார ரீதியாக வலிமையான ஒரு புதிய உலக ஒழுங்கிற்குள் (New World Order) கொண்டு வரும் எனச் சர்வதேச அரசியல் வல்லுநர்கள் கணித்துள்ளனர்.
