ஜெர்மனியின் கிழக்குப் பகுதியில் அமைந்துள்ள புகழ்பெற்ற லைப்சிக்-ஹாலே (Leipzig/Halle) விமான நிலையத்தில், வெடிபொருட்களுடன் கூடிய மர்ம ட்ரோன் (Drone) ஒன்று உக்ரைன் நாட்டின் சரக்கு விமானத்திற்கு மிக அருகில் கண்டெடுக்கப்பட்ட சம்பவம் உலகளவில் பெரும் அதிர்ச்சியை ஏற்படுத்தியுள்ளது. நள்ளிரவில் ரோந்துப் பணியில் ஈடுபட்ட விமான நிலைய ஊழியர் ஒருவர் இந்த ட்ரோனைக் கண்டு அதிகாரிகளுக்குத் தகவல் தெரிவித்துள்ளார்.
சம்பவ இடத்திற்கு உடனடியாக விரைந்து வந்த ஜெர்மனி மத்தியக் காவல் துறையினர் மற்றும் குண்டுவெடிப்புத் தடுப்புப் பிரிவினர், அதிநவீன ரோபோ உதவியுடன் அந்த ட்ரோனில் பொருத்தப்பட்டிருந்த வெடிபொருளைப் பத்திரமாக அகற்றிச் செயலிழக்கச் செய்தனர். உக்ரைனின் ‘அன்டோனோவ் ஏர்லைன்ஸ்’ (Antonov Airlines) நிறுவனத்திற்குச் சொந்தமான பிரம்மாண்ட சரக்கு விமானங்கள் நிறுத்தப்பட்டிருந்த ஓடுபாதைப் பகுதிக்கு அருகிலேயே இந்த வெடிகுண்டு ட்ரோன் மீட்கப்பட்டுள்ளது.
இந்தச் சம்பவத்தின் போது, தரையிறங்க முயன்ற மற்றொரு DHL சரக்கு விமானம் காற்றில் மர்மப் பொருள் ஒன்றுடன் லேசாக மோதியதாகக் கூறப்படும் நிலையில், அவ்விமானம் மாற்றுப் பாதையில் ஹேனோவர் விமான நிலையத்திற்குத் திருப்பி விடப்பட்டுப் பாதுகாப்பாகத் தரையிறக்கப்பட்டது. இந்த அச்சுறுத்தல் காரணமாக லைப்சிக் விமான நிலையத்தின் விமானப் போக்குவரத்து சில மணி நேரம் முற்றிலுமாக முடக்கப்பட்டது.
நேட்டோ (NATO) அமைப்பின் ராணுவப் பொருட்கள் மற்றும் உக்ரைனுக்கான நிவாரணப் பொருட்களைக் கொண்டு செல்லும் முக்கிய மையமாக இந்த விமான நிலையம் செயல்பட்டு வருகிறது. இதனால் உக்ரைன் மீதான ரஷ்யாவின் சதிச்செயலாக இது இருக்கலாம் என ஜெர்மனி மற்றும் ஐரோப்பிய உளவுத்துறை சந்தேகிக்கிறது. இந்தத் தாக்குதல் முயற்சி தொடர்பாக ஜெர்மனி அரசு தீவிர பயங்கரவாத தடுப்பு விசாரணையைத் தொடங்கியுள்ளது.
