ஜெம் கிரானைட்ஸ் (GEM Granites) நிறுவனத்தின் தலைவரான 85 வயதான தொழிலதிபர் ஆர். வீரமணி மீதான போக்சோ வழக்கு விசாரணையில், நாளுக்கு நாள் அதிர்ச்சியூட்டும் தகவல்கள் வெளியாகி வருகின்றன. ஏற்கனவே ஒன்பதுக்கும் மேற்பட்ட பாதிக்கப்பட்ட பெண்கள் மற்றும் சிறுமிகள் நீதிமன்றத்தில் வாக்குமூலம் அளித்துள்ள நிலையில், தற்போது 50 வயதுடைய பெண் ஒருவர், தான் 13 வயது சிறுமியாக இருந்த 1989-ஆம் ஆண்டிலேயே தொழிலதிபர் வீரமணியால் பாலியல் வன்கொடுமைக்கு ஆளாக்கப்பட்டதாகக் காவல் துறையிடம் பரபரப்பான வாக்குமூலம் அளித்துள்ளார்.
பாதிக்கப்பட்ட அந்தப் பெண் அளித்த வாக்குமூலத்தின்படி, 1989-ஆம் ஆண்டு தான் 13 வயது சிறுமியாக இருந்தபோது, புதிய ஆடைகள் மற்றும் பரிசுகளை வழங்கி உதவி செய்வது போல் நடித்துத் தொழிலதிபர் வீரமணி தன்னைப் பாலியல் வன்கொடுமை செய்ததாகத் தெரிவித்துள்ளார். அதுமட்டுமின்றி, தனது மிரட்டலுக்கு அடிபணியச் செய்து, மேலும் பல சிறுமிகளை அவரிடம் அழைத்து வரச் சொல்லி கட்டாயப்படுத்தியதாகவும், அவராலும் பல சிறுமிகள் பாலியல் சுரண்டலுக்கு ஆளானதாகவும் அந்தப் பெண் அதிர்ச்சி குற்றச்சாட்டை முன்வைத்துள்ளார்.
கல்வி உதவித்தொகை மற்றும் நிதி உதவி வழங்குவதாகக் கூறி ஏழைக் குடும்பங்களைச் சேர்ந்த சிறுமிகளை இலக்காகக் கொண்டு, தொழிலதிபர் வீரமணி மற்றும் அவரது கூட்டாளிகளான சாந்தி, மகேந்திர சிம்மன் ஆகியோர் பல தசாப்தங்களாக இந்த அநீதியை அரங்கேற்றி வந்தது காவல் துறை விசாரணையில் அம்பலமாகியுள்ளது. 35 ஆண்டுகளுக்கும் மேலாக நீடித்து வரும் இந்தத் தொடர் குற்றச்சாட்டுகளின் பின்னணியில், வழக்கிற்கு மேலும் பல சட்டப்பிரிவுகள் சேர்க்கப்பட்டு சென்னை மத்திய குற்றப்பிரிவினர் புழல் சிறை வளாகத்திற்குள்ளேயே வைத்து விசாரணையை தீவிரப்படுத்தியுள்ளனர்.
ஏற்கனவே இந்த விவகாரத்தில் முதல்வர் விஜய்யின் கண்டிப்பான உத்தரவைத் தொடர்ந்து, காவல் துறை விசாரணையை வேகப்படுத்தியுள்ளது. 1989 முதலே இந்தச் சட்டவிரோதச் செயல்கள் நடைபெற்று வந்துள்ளது வெளிச்சத்திற்கு வந்துள்ளதால், வழக்கில் தொடர்புடைய இடைத்தரகர்கள் மற்றும் உடந்தையாக இருந்த அனைவரையும் கைது செய்யச் சிறப்புத் தனிப்படைகள் அமைக்கப்பட்டுத் தொடர் நடவடிக்கைகள் எடுக்கப்பட்டு வருகின்றன.
