இந்தோனேசியாவின் சுந்தா ஜலசந்தி பகுதியில் அமைந்துள்ள ‘அனக் க்ரக்கடோவா’ (Anak Krakatoa) எரிமலை ஞாயிற்றுக்கிழமை அதிகாலையில் திடீரென அதிதீவிரத்துடன் வெடித்துச் சிதறியது. எரிமலையின் மையப் பகுதியில் இருந்து கொதிக்கும் லாவா குழம்புகள் நீரூற்று போல (Lava Fountains) வான்நோக்கிப் பீறிட்டுப் பாய்ந்த தோற்றமும், சுமார் 700 கிலோமீட்டர் சுற்றளவுக்குக் கேட்ட அதிபயங்கர வெடிச்சத்தங்களும் அப்பகுதி மக்களைக் கடும் பீதியில் ஆழ்த்தியுள்ளன.
வெள்ளிக்கிழமை இரவில் இருந்தே சீற்றத்துடன் காணப்பட்ட இந்த எரிமலை, ஞாயிறன்று மேலும் தீவிரமடைந்து வானத்தை நோக்கிப் பாறைகள், கொதிக்கும் கல் துகள்கள் மற்றும் அடர்ந்த எரிமலைச் சாம்பலைப் பொழிந்தது. இதனால் உருவான அடர்ந்த சாம்பல் மேகங்கள் வான்வெளியில் பரவியதால், இந்தோனேசியத் தலைநகர் ஜாகார்த்தாவில் உள்ள சோகர்னோ-ஹாட்டா சர்வதேச விமான நிலையம் உட்பட 6 முக்கிய விமான நிலையங்களின் சேவைகள் தற்காலிகமாக முழுமையாக நிறுத்தப்பட்டன. இதன் காரணமாகச் சிங்கப்பூர், சிட்னி, கோலாலம்பூர் மற்றும் டோஹா செல்லவிருந்த 200-க்கும் மேற்பட்ட விமானங்கள் ரத்து செய்யப்பட்டு, 22,000-க்கும் அதிகமான பயணிகள் கடுமையாகப் பாதிக்கப்பட்டனர்.
எரிமலைச் சீற்றத்தால் கிளம்பிய சாம்பல் மழை ஜாவா மற்றும் சுமாத்ரா தீவுகளின் முக்கிய நகரங்களைச் சூழ்ந்ததால், பிரதான சாலைகளில் வாகன ஓட்டிகளின் பார்வையைத் தெளிவுபடுத்தத் தீயணைப்பு வாகனங்கள் மூலம் தண்ணீர் தெளிக்கப்பட்டு வருகிறது. அப்பகுதி மக்களுக்குக் கண் எரிச்சல் மற்றும் சுவாசப் பிரச்சனைகள் ஏற்படுவதைத் தவிர்க்கப் பொதுமக்கள் வெளியே வரும்போது கட்டாயம் முகக்கவசம் மற்றும் பாதுகாப்பு நொடியாடைகளை அணியுமாறு அந்நாட்டு நிலவியல் மற்றும் ஆபத்து தணிப்பு முகமை (PVMBG) அவசர எச்சரிக்கை விடுத்துள்ளது.
தற்போது ‘லெவல் 3’ (Alert) எச்சரிக்கை நிலையில் வைக்கப்பட்டுள்ள அனக் க்ரக்கடோவா எரிமலையைச் சுற்றி 3 கிலோமீட்டர் சுற்றளவுக்குக் பொதுமக்கள் மற்றும் மீனவர்கள் செல்லத் தடை விதிக்கப்பட்டுள்ளது. கடந்த 2018-ஆம் ஆண்டு ஏற்பட்ட கொடூர சுனாமிப் பேரழிவைப் போல இந்தமுறை பெரிய அளவிலான நிலச்சரிவோ சுனாமி ஆபத்தோ ஏற்படுவதற்கான சாத்தியக்கூறுகள் இல்லை என அதிகாரிகள் உறுதிளித்துள்ள போதிலும், தொடர் நில அதிர்வுகளாலும் வெடிச்சத்தங்களாலும் இந்தோனேசியா மக்கள் மிகுந்த அச்சத்தில் உறைந்துள்ளனர்.
