வளைகுடா பிராந்தியத்தில் அமைந்துள்ள ஹார்முஸ் ஜலசந்தியில் உளவுப் பணியில் ஈடுபட்டிருந்த அமெரிக்க ராணுவத்தின் 2-வது அதிநவீன நீருக்கடி ட்ரோனை (Autonomous Underwater Vehicle) தங்களது கடற்படை சிறைப்பிடித்துள்ளதாக ஈரான் புரட்சிகரக் காவல் படை (IRGC) அறிவித்துள்ளதுடன், அது தொடர்பான வீடியோ ஆதாரத்தையும் வெளியிட்டுள்ளது.
ஈரான் அரசு தொலைக்காட்சி மூலம் வெளியிடப்பட்டுள்ள வீடியோ காட்சிகளில், ‘ரெமஸ் 600’ (Remus 600) ரகத்தைச் சேர்ந்த அமெரிக்காவின் தன்னாட்சி நீருக்கடி ட்ரோனை ஈரானியப் படையினர் தண்ணீரிலிருந்து மீட்டுத் தங்களது படகில் ஏற்றும் காட்சிகள் இடம்பெற்றுள்ளன. உளவு சேகரிப்பு மற்றும் கடல்சார் கண்காணிப்புப் பணிகளுக்காகப் பயன்படுத்தப்படும் இந்த அதிநவீன ட்ரோன், மின்னணுப் போர்முறை மற்றும் துல்லிய உளவுத் தகவல்கள் மூலம் முழுமையாகத் தங்களது கட்டுப்பாட்டுக்குள் கொண்டு வரப்பட்டதாக ஈரான் தெரிவித்துள்ளது.
நடப்பு செப்டம்பர் மாதத் தொடக்கத்தில் ‘டிவ்-எல்டி’ (Dive-LD) என்ற மற்றொரு அமெரிக்க ட்ரோனைச் சிறைப்பிடித்த ஈரான், தற்போது ஒரே மாதத்திற்குள் 2-வது அமெரிக்க நீருக்கடி ட்ரோனைத் தன்வசப்படுத்தியுள்ளது. ஹார்முஸ் ஜலசந்திப் பகுதி தற்போது தடைசெய்யப்பட்ட பாதுகாக்கப்பட்ட மண்டலமாக அறிவிக்கப்பட்டுள்ளதாகவும், அனுமதியின்றி நுழையும் எந்தவொரு வெளிநாட்டு ராணுவ ஊடுருவல்களுக்கும் எதிராகக் கடுமையான நடவடிக்கைகள் தொடரும் என்றும் ஈரான் புரட்சிகரக் காவல் படை எச்சரித்துள்ளது.
தன்வசப்பட்டுள்ள ‘ரெமஸ் 600’ ட்ரோனிலிருந்து முக்கியமான உளவுத் தரவுகளைப் (Data Recovery) பிரித்தெடுக்கும் பணியில் ஈரானிய ராணுவத் தொழில்நுட்ப வல்லுநர்கள் ஈடுபட்டுள்ளனர். இச்சம்பவம் குறித்து அமெரிக்கக் கடற்படை அல்லது பென்டகன் இதுவரை அதிகாரப்பூர்வப் பதிலளிக்காத நிலையில், ஹார்முஸ் ஜலசந்தி வழியிலான கடல்சார் மோதல்கள் அமெரிக்கா மற்றும் ஈரான் இடையே புதிய அச்சுறுத்தலை ஏற்படுத்தியுள்ளன.
