லெபனானுக்குள் ஊடுருவி கோட்டையைக் கைப்பற்றியது இஸ்ரேல்!

மத்திய கிழக்கு பிராந்தியத்தில் நிலவி வரும் கடுமையான போர்ப் பதற்றங்களுக்கு மத்தியில், தெற்கு லெபனானின் மலைப்பகுதியில் அமைந்துள்ள வரலாற்றுச் சிறப்புமிக்க ‘போஃபர்ட் கோட்டையை’ (Beaufort Castle) இஸ்ரேலிய ராணுவம் அதிரடியாகக் கைப்பற்றியுள்ளது. கடந்த 26 ஆண்டுகளில் லெபனான் நாட்டுப் எல்லைக்குள் இஸ்ரேல் மேற்கொண்டுள்ள மிக ஆழமான தரைவழி ஊடுருவல் நடவடிக்கை இதுவாகும். சில வாரங்களுக்கு முன்பு அறிவிக்கப்பட்ட போர்நிறுத்த உடன்பாடுகளையும் தாண்டி, ஹெஸ்புல்லா அமைப்பினருக்கு எதிரான தங்களின் ராணுவ நடவடிக்கையை இஸ்ரேல் தீவிரமாக விரிவுபடுத்தியுள்ளதை இந்த நகர்வு உறுதிப்படுத்தியுள்ளது.

சுமார் 900 ஆண்டுகள் பழமையான, சிலுவைப் போர்க் காலத்தைச் (Crusader-era) சேர்ந்த இந்தக் கோட்டையைக் கைப்பற்றிய இஸ்ரேல் பாதுகாப்புப் படையினர் (IDF), அதன் உச்சியில் தங்களின் தேசியக் கொடியை ஏற்றிப் பறக்கவிட்டுள்ளனர். லெபனானின் நபதியே (Nabatiyeh) நகருக்கு அருகே உள்ள அர்னான் கிராமத்தின் மலை உச்சியில் இந்தக் கோட்டை அமைந்துள்ளது. இக்கோட்டையைச் சுற்றியுள்ள மூலோபாய முக்கியத்துவம் வாய்ந்த மலைப்பகுதிகள் மற்றும் வாடி அல்-சலூகி பள்ளத்தாக்குகளைத் தங்களின் முழுமையான கட்டுப்பாட்டுக்குள் கொண்டு வந்துள்ளதாக இஸ்ரேலிய ராணுவம் அதிகாரப்பூர்வமாக அறிவித்துள்ளது.

இந்தக் கோட்டை சிதிலமடைந்த பழங்காலக் கட்டிடமாக இருந்தாலும், தற்போதைய நவீனப் போரிலும் இது மிக முக்கியப் பாதுகாப்பு அரணாகக் கருதப்படுகிறது. லெபனானின் லிடானி நதிப் பள்ளத்தாக்கு மற்றும் இஸ்ரேலின் வடக்கு எல்லைக் கிராமங்கள் ஆகிய இரண்டு பக்கங்களையும் ஒரே நேரத்தில் கண்காணிக்கும் மிக உயரமான இயற்கை கண்காணிப்புக் கோபுரமாக (Vantage Point) இந்த மலை உச்சி விளங்குவதே இதற்குக் காரணமாகும். இப்பகுதியிலிருந்து ஹெஸ்புல்லா அமைப்பினர் இஸ்ரேல் மீது ஏவுகணைகளைத் தாக்குவதைத் தடுக்கவும், தங்களின் புதிய பாதுகாப்பு வளையத்தை (Security Zone) அங்கு உருவாக்கவும் இக்கோட்டையை இஸ்ரேல் ஒரு பிரதான இலக்காக மாற்றியுள்ளது.

கடந்த 1982 முதல் 2000ஆம் ஆண்டு வரையிலான 18 ஆண்டுகால லெபனான் ஆக்கிரமிப்பின் போது இந்தக் கோட்டையை இஸ்ரேல் ஏற்கனவே தனது வசம் வைத்திருந்தது குறிப்பிடத்தக்கது. தற்போது கால் நூற்றாண்டுக்குப் பிறகு மீண்டும் இக்கோட்டை இஸ்ரேல் வசம் சென்றுள்ளதற்கு லெபனான் பிரதமர் நவாப் சலாம் கடும் கண்டனம் தெரிவித்துள்ளார். யுனெஸ்கோ (UNESCO) அமைப்பால் சிறப்புப் பாதுகாப்பு அங்கீகாரம் வழங்கப்பட்ட இந்த வரலாற்றுச் சின்னத்தின் மீது இஸ்ரேல் தாக்குதல் நடத்திப் பழிவாங்கும் அரசியலை முன்னெடுப்பதாக லெபனான் தரப்புக் குற்றம் சாட்டியுள்ளது.