2019-ஆம் ஆண்டு முதல் 2026 ஆகஸ்ட் வரையிலான காலகட்டத்தில் இஸ்ரேல் பிரதமர்களின் தலைமுடி பராமரிப்பு, ஒப்பனை (Makeup) மற்றும் அதிகாரப்பூர்வ தோற்றப் பொலிவுச் செலவுகளுக்காக (Official Representation) அரசு கருவூலத்திலிருந்து சுமார் 4,70,000 அமெரிக்க டாலர்கள் (சுமார் 1.43 மில்லியன் ஷேகல்கள்) செலவிடப்பட்டுள்ளதாக உத்தியோகபூர்வ தரவுகள் மூலம் தெரியவந்துள்ளது.
இஸ்ரேலின் ‘தகவல் அறியும் உரிமை இயக்கம்’ (Movement for Freedom of Information) தொடர்ந்த சட்டப் போராட்டத்தைத் தொடர்ந்து, அந்நாட்டின் பிரதமர் அலுவலகம் இந்த அதிரவைக்கும் புள்ளிவிவரங்களை அதிகாரப்பூர்வமாக வெளியிட்டுள்ளது. வெளியிடப்பட்ட அறிக்கையின்படி, இந்த மொத்தத் தொகையில் 90 சதவீதத்திற்கும் அதிகமான செலவை தற்போதைய பிரதமர் பெஞ்சமின் நெதன்யாஹு மற்றும் அவரது மனைவி சாரா நெதன்யாஹு ஆகிய இருவரே செய்துள்ளனர் என்பது குறிப்பிடத்தக்கது.
குறிப்பாக 2025-ஆம் ஆண்டு பெஞ்சமின் நெதன்யாஹுவின் வாஷிங்டன் பயணத்தின் போது, அவரது ஒப்பனை மற்றும் அலங்காரத்திற்காக மட்டும் ஒரே பயணத்தில் 13,500 அமெரிக்க டாலர்கள் செலவிடப்பட்டதாக ஆவணங்கள் கூறுகின்றன. மேலும், 2023-ஆம் ஆண்டு காசா போர் உச்சத்திலிருந்த காலகட்டத்திலும் கூட பிரதமரின் தலைமுடி ஒப்பனைக்காகப் பல்லாயிரம் ஷேகல்கள் அரசுப் பணத்திலிருந்து செலவிடப்பட்டுள்ளது மக்களிடையே கொந்தளிப்பை ஏற்படுத்தியுள்ளது.
அதேவேளையில், முன்னாள் பிரதமர்களான நஃப்தாலி பென்னட் மற்றும் யாயிர் லேபிட் ஆகியோரின் ஆட்சிக்காலத்தில் இந்த ஒப்பனைச் செலவுகள் கணிசமாகக் குறைவாகவே இருந்ததாகக் கூறப்படுகிறது. மக்கள் கடுமையான பொருளாதார நெருக்கடியைச் சந்தித்து வரும் வேளையில், பிரதமரின் தனிப்பட்ட தோற்றப் பொலிவிற்காக மக்களின் வரிப்பணம் ஆடம்பரமாகச் செலவிடப்பட்டுள்ளதாக எதிர்க்கட்சிகளும் பொதுமக்களும் கடும் கண்டனம் தெரிவித்து வருகின்றனர்.
