லைகா புரொடக்ஷன்ஸ் தயாரிப்பில் சந்தீப் கிஷன் நடிப்பில் உருவாகியுள்ள ‘சிக்மா’ படத்தின் மூலம் தமிழ் சினிமாவில் இயக்குநராக அறிமுகமாகவுள்ள ஜேசன் சஞ்சய், தனது சிறுவயதில் தந்தை விஜய்யுடன் ‘வேட்டைக்காரன்’ படப் பாடலுக்கு நடனமாடியபோது ஏற்பட்ட சுவாரசியமான அனுபவம் குறித்துத் தனியார் ஊடக நேர்காணல் ஒன்றில் நெகிழ்ச்சியுடன் பகிர்ந்துள்ளார். ஷூட்டிங் ஸ்பாட்டில் திடீரெனத் திரண்ட ஆயிரக்கணக்கான கூட்டத்தைப் பார்த்ததும் பயந்து போய் அப்பாவைக் கட்டிப்பிடித்த சம்பவத்தை அவர் நினைவு கூர்ந்துள்ளார்.
2009-ஆம் ஆண்டு வெளியான ‘வேட்டைக்காரன்’ படத்தில் இடம்பெற்ற “நான் அடிச்சா தாங்கமாட்ட” பாடலில் தந்தை விஜய்யுடன் சேர்ந்து சிறுவன் ஜேசன் சஞ்சய் நடனமாடியிருப்பார். அது குறித்துப் பேசிய அவர், “அப்போது எனக்கு மிகவும் சிறிய வயது. கேமரா முன்னாடி ஆடுவது பெரிய விஷயமாகத் தெரியவில்லை. ஆனால், படப்பிடிப்பைப் பார்க்க வந்திருந்த ஆயிரக்கணக்கான மக்களின் கூச்சலையும் ஆரவாரத்தையும் பார்த்ததும் எனக்குத் திடீரெனப் பயம் வந்துவிட்டது. உடனடியாக ஓடிச் சென்று அப்பாவைக் கட்டிப்பிடித்துக் கொண்டேன்; பின்னர் அவர்தான் என்னைச் சமாதானப்படுத்தி தைரியம் கூறினார்” எனக் கூறியுள்ளார்.
சிறுவயதிலிருந்தே தனக்குக் கதைகள் எழுதும் பழக்கம் இருந்ததாகவும், கனடாவில் திரைப்படக் கல்வியைப் படித்த பிறகே இயக்கம் சார்ந்த ஆர்வம் முழுமையாக வளர்ந்தது என்றும் ஜேசன் சஞ்சய் தெரிவித்துள்ளார். மேலும், “எந்தவொரு பின்னணியும் இல்லாமல் சுயமாக எனது அடையாளத்தை உருவாக்க வேண்டும் என்று அப்பா விரும்பினார்; அதை நானும் ஏற்றுக்கொண்டேன்” எனக் குறிப்பிட்ட அவர், ஹாலிவுட் வாய்ப்பு கிடைத்தால் தனது முதல் தேர்வாகத் தந்தை விஜய்யே இருப்பார் என்றும் புன்னகையுடன் தெரிவித்துள்ளார்.
விஜய் மற்றும் அவரது குடும்பத்தைச் சுற்றிச் சமூக வலைதளங்களில் பல்வேறு வதந்திகள் உலா வந்த நிலையில், ஜேசன் சஞ்சய் தனது தந்தை குறித்துப் பகிரங்கமாகவும் அன்பாகவும் பேசியுள்ள இந்த நேர்காணல் இணையத்தில் வைரலாகி வருகிறது. தந்தைக்கும் மகனுக்கும் இடையே உள்ள இந்த நெகிழ்ச்சியான பிணைப்பைக் கண்டு விஜய் ரசிகர்கள் பலரும் இக்காணொலியைச் சமூக வலைதளங்களில் உற்சாகத்துடன் பகிர்ந்து வருகின்றனர்.
