Posted in

மதுரை ஓட்டுநர் பாலகிருஷ்ணன் மரணம்: உடலில் 5 ரத்தக்காயங்கள் இருப்பதாக பிரேதப் பரிசோதனையில் தகவல்

மதுரை மாவட்டம் செக்கானூரணி காவல் நிலையத்தில் விசாரணைக்காக அழைத்துச் செல்லப்பட்டு உயிரிழந்த லாரி ஓட்டுநர் பாலகிருஷ்ணனின் உடலில் 5 ரத்தக்காயங்கள் இருந்ததாகப் பிரேதப் பரிசோதனை அறிக்கையில் தெரியவந்துள்ளது. மதுரை அரசு ராஜாஜி மருத்துவமனையில் நடைபெற்ற உடற்கூறாய்வில், அவரது மூளையில் வீக்கம் மற்றும் ரத்தக்கசிவு ஏற்பட்டிருந்ததோடு, இதயம் மற்றும் நுரையீரல்களிலும் வீக்கம் இருந்ததாகத் தகவல்கள் வெளியாகியுள்ளன.

கடந்த நவம்பர் 14-ஆம் தேதி (சனிக்கிழமை) அதிகாலை செக்கானூரணி காவல் நிலையத்தில் பாலகிருஷ்ணன் தூக்கிட்டுத் தற்கொலை செய்துகொண்டதாகக் காவல்துறை தரப்பில் கூறப்பட்டது. ஆனால், அவரது கழுத்திற்குக் கீழே கயிற்றுத் தடத்திற்கு அருகே ஊசியால் குத்தியது போன்ற மூன்று காயங்களும், முதுகுப் பகுதியிலும் காயங்களும் இருந்ததாகப் பாலகிருஷ்ணன் தரப்பு வழக்கறிஞர் தெரிவித்துள்ளார்.

இதனிடையே, பாலகிருஷ்ணன் தற்கொலை செய்திருக்க வாய்ப்பில்லை என்றும், காவல்துறையினர் அடித்துத் துன்புறுத்தியதாலேயே அவர் உயிரிழந்ததாகவும் குற்றம் சாட்டி அவரது தாயார் மற்றும் உறவினர்கள் மதுரை கோரிப்பாளையம் பகுதியில் தொடர்ந்து மூன்றாவது நாளாகச் சாலை மறியல் போராட்டத்தில் ஈடுபட்டனர். இந்தச் சம்பவம் தொடர்பாகச் செக்கானூரணி காவல் ஆய்வாளர் முத்து மற்றும் தலைமைக் காவலர்கள் பழனிவேல் ராஜன், கலைச்செல்வி ஆகிய மூன்று பேர் ஏற்கனவே பணியிடை நீக்கம் செய்யப்பட்டுள்ளனர்.

இந்த வழக்கை விசாரித்து வரும் சிபிசிஐடி (CBCID) காவல்துறையினர், பணியிடை நீக்கம் செய்யப்பட்ட மூன்று காவலர்களுக்கும் விசாரணைக்கு ஆஜராகுமாறு சம்மன் அனுப்பியுள்ளனர். வழக்கில் தொடர்புடைய அனைவரையும் கைது செய்யும் வரை உடலைப் பெற்றுக்கொள்ள மாட்டோம் எனக் குடும்பத்தினர் அறிவித்துள்ள நிலையில், சாலை மறியலில் ஈடுபட்ட உறவினர்களைக் காவல்துறையினர் கைது செய்துள்ளனர்.