பிரிட்டன் தலைநகர் லண்டனின் வடமேற்கு பகுதியில் உள்ள கோல்டர்ஸ் கிரீன் (Golders Green) வணிக வளாக வீதியில் அமைந்துள்ள பிரபல யூத சூப்பர் மார்க்கெட்டில் இன்று காலை திடீரெனப் பயங்கர தீ விபத்து ஏற்பட்டுள்ளது. லண்டனில் உள்ள யூத சமூக மக்கள் (Jewish Community) மிக அதிக அளவில் வசிக்கும் இப்பகுதியில் உள்ள மிகப்பெரிய கோஷர் (Kosher Kingdom) வணிக வளாகத்தின் பின்புற சேமிப்புக் கிடங்கில் இந்தத் தீ விபத்து ஏற்பட்டுள்ளது. இச்சம்பவம் குறித்து தகவல் அறிந்ததும் லண்டன் தீயணைப்புப் படையினர் சம்பவ இடத்திற்கு விரைந்து வந்து மீட்புப் பணியைத் தீவிரப்படுத்தினர்.
இன்று காலை சுமார் 6:47 மணியளவில் இந்தத் தீ விபத்து குறித்து அவசரக் கட்டுப்பாட்டு அறைக்கு அடுத்தடுத்து 50-க்கும் மேற்பட்ட அழைப்புகள் வந்ததாகத் தீயணைப்புத் துறை தெரிவித்துள்ளது. மூன்று அடுக்குகள் கொண்ட அந்த வணிகக் கட்டிடத்தின் தரைத்தளத்தில் உள்ள சூப்பர் மார்க்கெட்டையும், அதன் பின்புறப் பகுதியையும் தீ மளமளவெனச் சூழ்ந்து கொண்டு கொழுந்துவிட்டு எரிந்தது. இதன் காரணமாக அப்பகுதி முழுவதும் கரும்புகை மூட்டம் சூழ்ந்து காட்சியளித்ததால், அப்பகுதி மக்கள் தங்களின் வீடுகளின் கதவுகள் மற்றும் ஜன்னல்களைப் பத்திரமாக மூடி வைக்குமாறு தீயணைப்புத் துறையினர் அவசர அறிவுறுத்தல் விடுத்துள்ளனர்.
இந்தக் கடுமையான தீயை அணைக்கும் பணியில் 15 தீயணைப்பு வாகனங்களுடன் (Fire Engines) சுமார் 100 தீயணைப்பு வீரர்கள் தங்களின் உயிரைப் பணயம் வைத்துப் பல மணி நேரம் தீவிரமாகப் போராடினர். லண்டன் பெருநகரக் காவல் துறையினர் (Metropolitan Police) சம்பவ இடத்திற்கு விரைந்து வந்து, பாதுகாப்பு கருதி கோல்டர்ஸ் கிரீன் சாலையின் முக்கியப் போக்குவரத்து சந்திப்புகளை முழுமையாக மூடி, அப்பகுதியில் இருந்த பொதுமக்களைப் பாதுகாப்பாக வெளியேற்றினர். அதிர்ஷ்டவசமாக இந்த கோர விபத்தில் யாருக்கும் எவ்வித உயிரிழப்போ அல்லது காயங்களோ ஏற்படவில்லை என்று முதற்கட்டத் தகவல்கள் உறுதிப்படுத்தியுள்ளன .
கடந்த சில மாதங்களாக லண்டனில் உள்ள யூத வழிபாட்டுத் தலங்கள் மற்றும் சமூக மையங்களைக் குறிவைத்துத் தொடர்ச்சியாகச் சில தீவைப்புத் தாக்குதல்கள் (Arson Attacks) அரங்கேறி வரும் நிலையில், இந்தத் தீ விபத்து பெரும் பரபரப்பை ஏற்படுத்தியுள்ளது. எனினும், இந்த விபத்துக்கான துல்லியமான காரணம் என்ன என்பது குறித்து இப்போதே கூற முடியாது என்றும், தீ முழுமையாகக் கட்டுக்குள் கொண்டு வரப்பட்ட பின்னர் தீவிர விசாரணை நடத்தப்படும் என்றும் லண்டன் போலீசார் தெரிவித்துள்ளனர்.
