காவிரி நதிநீர் பங்கீடு மற்றும் மேகதாது அணை விவகாரத்தில் கர்நாடக அரசுடன் தனியாகப் பேச்சுவார்த்தை நடத்த முயன்ற முதலமைச்சர் ச. ஜோசப் விஜய்யின் ராஜதந்திர முயற்சி தோல்வியடைந்து தமிழ்நாடு தனிமைப்படுத்தப்பட்டுள்ளதாகத் திமுக தலைவரும் முன்னாள் முதலமைச்சருமான மு.க. ஸ்டாலின் கடுமையாகக் குற்றம் சாட்டியுள்ளார். கர்நாடக அரசு அனைத்துக் கட்சிக் கூட்டத்தைக் கூட்டித் தங்களது ஒற்றுமையை நிருபித்துள்ள நிலையில், “தமிழ்நாட்டின் உரிமைகளைப் பாதுகாக்கக் காவிரி விவகாரத்தில் அனைத்துக் கட்சிக் கூட்டத்தைக் கூட்டத் தமிழ்நாடு முதலமைச்சரால் முடியுமா முடியாதா?” எனக் காரசாரமாகக் கேள்வி எழுப்பியுள்ளார்.
இது தொடர்பாக எக்ஸ் (X) தளத்தில் காரசார அறிக்கை வெளியிட்டுள்ள மு.க. ஸ்டாலின், “அரசியல் தலைவர்கள் மற்றும் உழவர் அமைப்புகளின் எச்சரிக்கைகளையும் மீறி, கர்நாடகாவுடன் தனி வழியில் பேச்சுவார்த்தை நடத்தலாம் என முதலமைச்சர் நினைத்தது தவறான முடிவாக அமைந்துவிட்டது. காவிரி மேலாண்மை வாரியம் தமிழ்நாட்டிற்கு நீர் திறக்க உத்தரவிட்டவுடனேயே, ‘இப்போதைக்கு வர வேண்டாம்’ என கர்நாடக அரசு முதலமைச்சர் விஜய்க்கு கதவுகளை மூடிவிட்டது. தனிநபர் சாபகீடான அரசியல் செய்ய முற்பட்டு, இன்று மாநிலத்தின் உரிமைகளைப் பலவீனப்படுத்திவிட்டு முதலமைச்சர் தனித்து நிற்கிறார்” எனச் சாடியுள்ளார்.
மேலும் தனது அறிக்கையில் சுட்டிக்காட்டியுள்ள அவர், “தமிழ்நாட்டை வெறும் உபரி நீரை வெளியேற்றும் வடிகாலாக மட்டுமே கர்நாடகா பார்க்கிறது என்பது கடந்தகால வரலாற்று அனுபவம் உணர்த்திய பாடம். காவிரி பிரச்சனையில் சட்டப் போராட்டமே ஒரே வழி என்பதை உணராமல், தன்னிச்சையாகச் செயல்பட்டது மிகப்பெரிய நிர்வாகத் தவறாகும். ஆகஸ்ட் 2-ஆம் தேதி கர்நாடக முதலமைச்சர் டி.கே. சிவகுமார் அனைத்துக் கட்சிக் கூட்டத்தைக் கூட்டி ஒட்டுமொத்த மாநிலத்தின் ஒற்றுமையைச் செயலில் காட்டுகிறார்; ஆனால், தமிழ்நாட்டின் வாழ்வாதாரப் பிரச்சனையில் நம் முதலமைச்சர் எப்போது அனைத்துக் கட்சிக் கூட்டத்தைக் கூட்டப் போகிறார்?” என வினவியுள்ளார்.
டெல்டா மாவட்டங்களில் குறுவை மற்றும் சம்பா சாகுபடிக்குத் தண்ணீர் இன்றி விவசாயிகள் தவித்து வரும் சூழலில், அரசியல் வேறுபாடுகளைக் கடந்து அனைத்துக் கட்சிகளையும் ஒருங்கிணைத்துத் தமிழ்நாட்டின் குரலை உரக்க உயர்த்த வேண்டும் என ஸ்டாலின் வலியுறுத்தியுள்ளார். மேகதாது அணைக்கு எதிரான சட்டமன்றத் தீர்மானத்தை அனைத்துக் கட்சிப் பிரதிநிதிகளுடன் சென்று பிரதமரிடம் நேரில் வழங்க வேண்டும் என்ற கோரிக்கை வலுத்து வரும் நிலையில், மு.க. ஸ்டாலினின் இந்தக் கேள்விகள் தமிழக அரசியல் களத்தில் பெரும் விவாதத்தைக் கிளப்பியுள்ளன.
