முதன்முறையாக டிராஃபிக் ஜாம்; கார் உரிம சட்டத்தில் கிம் ஜாங்-உன் தளர்வு; வடகொரிய தலைநகரில் குவியும் வாகனங்கள்!

வடகொரிய அதிபர் கிம் ஜாங் அன், கடந்த இரண்டு ஆண்டுகளாகத் தனிநபர் கார் உரிமம் தொடர்பான சட்டங்களில் (Private Car Ownership Law) குறிப்பிடத்தக்கத் தளர்வுகளைச் செய்துள்ளார். முன்பு அரசு அதிகாரிகள் மற்றும் ராணுவத்தினருக்கு மட்டுமே வழங்கப்பட்டு வந்த கார் வைத்திருக்கும் உரிமை, தற்போது உரிமம் பெற்ற வாகன ஓட்டிகள் தங்கள் வீட்டிற்கு ஒரு கார் என்ற அடிப்படையில் வாங்க அனுமதி அளிக்கப்பட்டுள்ளது. இதன் விளைவாக, பியோங்யாங் நகரின் முக்கிய சாலைகள் மற்றும் ஹோட்டல் பார்க்கிங் பகுதிகளில் வாகனங்கள் நிரம்பி வழிவதையும், முதன்முறையாக அந்த நகரில் ‘டிராஃபிக் ஜாம்’ ஏற்படுவதையும் செயற்கைக்கோள் புகைப்படங்கள் மற்றும் அங்கிருந்து வரும் தகவல்கள் உறுதிப்படுத்துகின்றன.

ஐக்கிய நாடுகள் சபையின் தடைகள் காரணமாக வடகொரியாவிற்கு நேரடியாகக் கார்களை ஏற்றுமதி செய்யத் தடை உள்ள நிலையிலும், சீனா போன்ற நாடுகளிலிருந்து உதிரிப் பாகங்கள் மற்றும் பிற வழிகளில் கார் இறக்குமதி அதிகரித்துள்ளது. குறிப்பாக, சீனாவில் இருந்து டயர்கள், என்ஜின் ஆயில் மற்றும் லூப்ரிகண்டுகள் இறக்குமதி செய்வது பல மடங்கு உயர்ந்துள்ளதைச் சீன சுங்கத் துறைத் தரவுகள் காட்டுகின்றன. கிம் ஜாங் அன் சமீபத்தில் ஒரு கார் சேவை மையத்திற்கு நேரில் சென்று ஆய்வு செய்த புகைப்படங்கள் வெளியான நிலையில், அங்கு ஒரு புதிய ‘கார் கலாச்சாரம்’ உருவாகி வருவதை இது உணர்த்துகிறது.

பியோங்யாங்கின் சாலைகளில் தற்போது மஞ்சள் நிற நம்பர் பிளேட் கொண்ட ‘தனியார்’ கார்கள் அதிக அளவில் காணப்படுகின்றன. முன்னதாக கருப்பு மற்றும் நீல நிற நம்பர் பிளேட்டுகள் மட்டுமே இருந்த நிலையில், தற்போது மஞ்சள் நிற பிளேட்டுகள் அந்த நகரின் அடையாளமாக மாறி வருகின்றன. இதனால் நகரின் முக்கிய இடங்களான ஹோட்டல்கள், பந்து வீச்சு மையங்கள் மற்றும் சந்தைகளுக்கு அருகில் பார்க்கிங் இடங்களுக்குத் தட்டுப்பாடு ஏற்பட்டுள்ளது. மேலும், எலெக்ட்ரிக் வாகனங்களின் (EV) எண்ணிக்கையும் அதிகரித்து வருவதால், அதற்கான சார்ஜிங் கட்டமைப்புகளும் நகரின் பல பகுதிகளில் உருவாக்கப்பட்டு வருகின்றன.

இந்த மாற்றம் வடகொரியாவின் மேல்தட்டு மக்கள் மற்றும் ‘டோன்ஜு’ (Donju) எனப்படும் தொழில் முனைவோர் மத்தியில் பெரும் வரவேற்பைப் பெற்றுள்ளது. இருப்பினும், சாதாரண மக்கள் மற்றும் சைக்கிள்களைப் பயன்படுத்துபவர்கள் இந்தத் திடீர் வாகனப் பெருக்கத்தால் சாலைகளில் செல்வதில் சிரமத்தைச் சந்தித்து வருகின்றனர். பொருளாதாரத் தடைகளுக்கு மத்தியிலும் வடகொரியா தனது உள்நாட்டுப் பொருளாதாரத்தைச் சீரமைக்க மற்றும் வெளிநாட்டுச் செலாவணியை ஈட்ட இந்த வாகன விற்பனைத் திட்டத்தைத் தீவிரமாக முன்னெடுத்து வருவதாகப் பொருளாதார நிபுணர்கள் கருதுகின்றனர்.