பெரு நாட்டிற்கு அரசு முறைப் பயணம் மேற்கொண்டுள்ள கத்தோலிக்கத் திருச்சபையின் தலைவர் போப் லியோ XIV, அங்குள்ள விமானப்படை ஹெலிகாப்டரில் பயணம் செய்தபோது காக்பிட் பகுதிக்குச் சென்றுள்ளார். சிக்லாயோ நகரில் இருந்து ஆண்டியன் மலைப்பகுதியில் அமைந்துள்ள சாண்டா க்ரூஸ் டி சுச்சாபம்பா நகருக்குப் பயணமானபோது இந்தச் சம்பவம் நிகழ்ந்துள்ளது.
சுமார் 45 நிமிடங்கள் நீடித்த இந்தப் பயணத்தின் போது, வழக்கமான இருக்கையில் அமர்வதைத் தவிர்த்துவிட்டு ஹெலிகாப்டரின் காக்பிட் பகுதிக்குச் சென்ற போப், விமானிகளுக்கு இடையே அமர்ந்து விமானத்தை இயக்கும் முறைகளைக் கவனித்தார். பெரு விமானப்படை வெளியிட்ட காட்சிகளில், போப் லியோ விமானிகளுடன் மகிழ்ச்சியுடன் உரையாடியபடியும், மலைப்பகுதிகளின் அழகைப் பார்வையிட்டபடியும் காணப்பட்டார்.
தமது பயணங்களின் போது விமானப் பணியாளர்களை நேரில் சந்தித்து அவர்கள் பணியாற்றும் முறைகளைக் கற்றுக்கொள்வதைப் போப் வழக்கமாகக் கொண்டுள்ளார். அந்த வகையில் பெரு நாட்டின் கடினமான மலைப்பகுதியில் ராணுவ ஹெலிகாப்டரில் அவர் மேற்கொண்ட இந்தப் பயணம் இராஜதந்திர மற்றும் ஆன்மீக வட்டாரங்களில் கவனம் ஈர்த்துள்ளது.
தமது சுற்றுப்பயணப் பணிகளை வெற்றிகரமாக நிறைவு செய்த அவர், அதே ஹெலிகாப்டரில் மீண்டும் சிக்லாயோ நகருக்குத் திரும்பினார். பயணத்தின் போது எடுக்கப்பட்ட இந்தக் காட்சிகள் சமூக வலைதளங்களில் பலராலும் பகிரப்பட்டு வருகின்றன.