பாகிஸ்தான் ராணுவத்தில் கேப்டனாகப் பணியாற்றிவிட்டு பின்னர் அதிலிருந்து விலகிய ரஹ்மான் குல், தடை செய்யப்பட்ட பலூசிஸ்தான் விடுதலைப் படையின் (பிஎல்ஏ) புதிய தலைவராகப் பொறுப்பேற்றுள்ளார். பலூசிஸ்தான் விடுதலைப் படையின் மூத்த கட்டளைக் குழு நடத்திய ஆலோசனைக் கூட்டத்திற்குப் பிறகு, இவரின் நியமனம் அதிகாரப்பூர்வமாக அறிவிக்கப்பட்டுள்ளது.
முன்னதாக ராணுவத்தில் பணியாற்றிய காலத்தில் வாஜிரிஸ்தான் பகுதியில் தலிபான்களுக்கு எதிரான நடவடிக்கைகளில் ரஹ்மான் குல் பங்கேற்றுள்ளார். கடந்த 2010-ஆம் ஆண்டு ராணுவப் பணியிலிருந்து வெளியேறிய அவர், பின்னர் பிஎல்ஏ அமைப்பில் இணைந்து தீவிர இயக்க நடவடிக்கைகளில் ஈடுபட்டு வந்துள்ளார்.
இந்த அமைப்பின் தற்கொலைப்படைப் பிரிவான மஜீத் பிரிகேட்டின் தலைவராகவும், பல்வேறு பகுதிகளில் முக்கியக் கட்டளைப் பொறுப்புகளிலும் இவர் செயல்பட்டு வந்துள்ளதாக ஊடகத் தகவல்கள் தெரிவிக்கின்றன. ராணுவப் பின்னணி கொண்ட ஒருவர் ஆயுதப் போராட்டக் குழுவின் தலைமைப் பொறுப்புக்கு வந்திருப்பது பாதுகாப்பு வட்டாரங்களில் கவனத்தை ஈர்த்துள்ளது.
தற்போது பலூசிஸ்தான் மாகாணத்தில் பாதுகாப்புப் படையினருக்கும் ஆயுதப் போராட்டக் குழுவினருக்கும் இடையே மோதல்கள் தொடர்ந்து அதிகரித்து வரும் சூழலில் இந்த மாற்றம் நிகழ்ந்துள்ளது. இந்த நியமனம் அப்பகுதியின் பாதுகாப்புச் சூழலில் என்ன மாதிரியான தாக்கங்களை ஏற்படுத்தும் என்பது குறித்துப் பாதுகாப்பு நிபுணர்கள் தீவிரமாகக் கண்காணித்து வருகின்றனர்.