உக்ரைனுக்கு எதிரான போர் தொடங்கி நான்கு ஆண்டுகளை எட்டியுள்ள நிலையில், போர்க்களத்தில் ரஷிய அதிபர் விளாடிமிர் புடினின் ராணுவம் வரலாறு காணாத அளவிலான வீரர்களை இழந்து வருவது சர்வதேச அளவில் பெரும் அதிர்ச்சியை ஏற்படுத்தியுள்ளது. போரை விரைவாக முடிக்க ரஷிய ராணுவம் கையாண்டு வரும் “மீட் க்ரைண்டர்” (Meat Grinder – மனிதர்களைப் பலிகடா ஆக்கும் தாக்குதல்) உத்திகளால், ஒரே மாதத்தில் மட்டும் சுமார் 43,000 ரஷிய வீரர்கள் கொல்லப்பட்டும் படுகாயமடைந்தும் உள்ளதாக மேற்கத்திய உளவு அமைப்புகளின் அறிக்கைகள் தெரிவிக்கின்றன.
கிழக்கு உக்ரைனில் உள்ள முக்கிய நகர்களைக் கைப்பற்ற ரஷியப் படைகள் தீவிரமாக முன்னேறி வருகின்றன. ஆனால், உக்ரைன் ராணுவத்தின் அதிநவீன ட்ரோன் தாக்குதல்கள் மற்றும் பலத்த பீரங்கித் தடுப்பு அரண்களை மீறி முன்னேறும்போது ரஷிய வீரர்கள் கூட்டம்கூட்டமாகப் பலியாகி வருகின்றனர். உக்ரைனின் உறுதியான எதிர்த்தாக்குதலால் ரஷியப் படைகள் சிறிய அளவிலான நிலப்பரப்பைக் கைப்பற்றுவதற்குக் கூட ஆயிரக்கணக்கான வீரர்களின் உயிரைப் பலி கொடுக்க வேண்டிய சூழல் உருவாகியுள்ளது.
முன்னணி போர்க்களத்தில் காயமடையும் வீரர்களை உடனடியாக மீட்காதது, அனுபவமற்ற புதிய படைவீரர்களைத் தகுந்த பயிற்சியின்றி நேரடியாகப் போருக்கு அனுப்புவது போன்ற ரஷிய ராணுவத் தலைமையின் அலட்சியப் போக்கே இந்த அதீத உயிரிழப்புகளுக்கு முக்கியக் காரணம் என பிரிட்டன் பாதுகாப்புத் துறை வட்டாரங்கள் சுட்டிக்காட்டுகின்றன. புடினின் இந்தப் பிடிவாதமான தாக்குதல் போக்கால், போரின் ஆரம்ப நாட்களுக்குப் பிறகு ரஷியா சந்தித்த மிக மோசமான மற்றும் கொடூரமான மாதமாக இது பார்க்கப்படுகிறது.
ரஷியத் தரப்பில் வீரர்களின் இழப்பு எண்ணிக்கை நாளுக்கு நாள் மிரட்டும் வகையில் அதிகரித்து வந்தாலும், மாஸ்கோ நிர்வாகம் இந்த உயிரிழப்புகளை வெளிப்படையாக ஒப்புக்கொள்ள மறுத்து வருகிறது. அதேவேளையில், படைவீரர்களின் தொடர் இழப்பு மற்றும் பற்றாக்குறை ரஷிய சமூகத்தில் பெரும் கொந்தளிப்பையும் புடின் அரசுக்குக் கடுமையான அரசியல் அழுத்தத்தையும் ஏற்படுத்தத் தொடங்கியுள்ளது.
