உக்ரைன் போர்க்களத்தில் இருந்து தப்பியோட முயன்றதாகக் கூறி, சொந்த நாட்டு வீரர் ஒருவருக்குப் பெண்களின் உடையை அணிவித்து ரஷ்ய ராணுவ அதிகாரிகள் கொடூரத் தண்டனை வழங்கிய வீடியோ சமூக வலைத்தளங்களில் வெளியாகி பெரும் அதிர்ச்சியை ஏற்படுத்தியுள்ளது. மேலும், அவருக்குப் பாலியல் ரீதியான அவமானங்களை ஏற்படுத்தி, மிகக் கடுமையான தாக்குதல் பகுதியான “இறைச்சி அரைக்கும் எந்திரம்” (Meat-Grinder) எனப்படும் முன்னரங்கிற்கு அனுப்பப் போவதாக அதிகாரிகள் மிரட்டும் காட்சிகளும் அந்த வீடியோவில் பதிவாகியுள்ளன.
டெலிகிராம் மற்றும் எக்ஸ் தளங்களில் பரவி வரும் அந்த வீடியோவில், ரஷ்யப் படைப்பிரிவைச் சேர்ந்த அதிகாரி ஒருவர், போர்ப் பணியைப் புறக்கணித்துத் தப்பியோட முயன்ற வீரரைத் தகாத வார்த்தைகளால் திட்டுவது கேட்கிறது. “பெண்களின் உடையை அணிந்து கொண்டு போர்க்களத்தின் முன்வரிசைக்குச் சென்று தாக்குதல் நடத்து, அப்போதாவது உனக்கு வெட்கம் வருகிறதா என்று பார்ப்போம்” எனக் கூறி அந்த அதிகாரியும் மற்ற வீரர்களும் அவரைக் கேலி செய்து அவமானப்படுத்துகின்றனர்.
ரஷ்ய ராணுவத்தில் போர்க்களத்தில் இருந்து தப்பிச்செல்லும் வீரர்கள் மற்றும் அதிகாரிகளின் உத்தரவுகளை மீறுபவர்கள் மீது இத்தகைய மிகக் கொடூரமான மற்றும் சட்டவிரோதமான தண்டனைகள் வழங்கப்பட்டு வருவதாக சர்வதேச மனித உரிமை அமைப்புகள் தொடர்ந்து குற்றம் சாட்டி வருகின்றன. மரங்களில் கட்டி வைப்பது, ஆழமான குழிக்குள் பூட்டி வைப்பது, மற்றும் உயிருக்குப் பாதுகாப்பற்ற தாக்குதல் பிரிவுகளுக்குப் பலவந்தமாக அனுப்புவது போன்ற மனிதநேயமற்ற நடைமுறைகள் ரஷ்யப் படைகளில் தீவிரமடைந்துள்ளதாகச் சுயாதீன ஊடகங்கள் தெரிவிக்கின்றன.
உக்ரைனுக்கு எதிரான போர் பல ஆண்டுகள் நீடித்து வரும் நிலையில், போதிய ஆயுதங்களும் உணவுப் பொருட்களும் இன்றித் தவிக்கும் ரஷ்ய வீரர்கள் பலர் மன உளைச்சலால் போர்க்களத்தை விட்டு வெளியேற முயன்று வருகின்றனர். இந்த வீடியோ வெளியீடு மூலம் ரஷ்ய ராணுவத்திற்குள் நிலவும் குறைந்த பட்ச ஒழுக்கம், மனசோர்வு மற்றும் சித்ரவதைகள் மீண்டும் சர்வதேச சமூகத்தின் கவனத்தை ஈர்த்துள்ளதுடன், மனித உரிமை ஆர்வலர்களின் கடும் கண்டனத்திற்கும் உள்ளாகியுள்ளது.
