தமிழகச் சட்டமன்றத் தேர்தல் 2026 முடிவுகளில் தமிழக வெற்றிக் கழகம் மிகப்பெரிய வெற்றியைப் பெற்று, இன்று அதன் தலைவர் விஜய் முதலமைச்சராகப் பதவியேற்றுள்ளார். இந்த வரலாற்றுச் சிறப்புமிக்க தருணத்தில், நாம் தமிழர் கட்சியின் தலைமை ஒருங்கிணைப்பாளர் சீமான் தனது எக்ஸ் (X) தளத்தில் வாழ்த்துச் செய்தி ஒன்றை வெளியிட்டுள்ளார். அதில், “தமிழகத்தில் நிலவி வந்த அறுபது ஆண்டுகால திராவிட அரசியலுக்கு முற்றுப்புள்ளி வைத்து, மக்களின் ஆதரவோடு ஆட்சிப் பொறுப்பேற்கும் அன்புத் தம்பி விஜய் தலைமையிலான புதிய அரசுக்கு எனது உளம் கனிந்த நல்வாழ்த்துகள்” என்று குறிப்பிட்டுள்ளார்.
சீமான் தனது பதிவில், “கலைத்துறையில் ஒரு உச்சத்தைத் தொட்டு, இன்று அரசியல் களத்திலும் மக்கள் செல்வாக்கைப் பெற்றுள்ள தம்பி விஜய்யின் பயணம் மென்மேலும் தொடர வாழ்த்துகிறேன். தமிழகத்தின் உரிமைகளை மீட்டெடுப்பதிலும், தமிழ் மக்களின் நலன் சார்ந்த திட்டங்களைச் செயல்படுத்துவதிலும் புதிய அரசு சிறப்பாகப் பணியாற்றும் என நம்புகிறேன்” எனத் தெரிவித்துள்ளார். தேர்தலுக்கு முன்னதாக இரு கட்சிகளுக்கும் இடையே சில அரசியல் கருத்து மோதல்கள் இருந்தபோதிலும், தம்பியின் வெற்றியை அண்ணனாக நின்று கொண்டாடுவதாகச் சீமான் தனது பதிவில் உணர்ச்சிப்பூர்வமாகப் பதிவிட்டுள்ளார்.
மேலும், நாம் தமிழர் கட்சிக்கு வாக்களித்த மற்றும் ஆதரவு தந்த அனைத்து தமிழ் உறவுகளுக்கும் இந்தத் தருணத்தில் சீமான் தனது நன்றியைத் தெரிவித்துக் கொண்டுள்ளார். தவெக தலைவர் விஜய், காங்கிரஸ் மற்றும் இதர கூட்டணிக் கட்சிகளின் ஆதரவுடன் 120 எம்.எல்.ஏ-க்களின் பலத்தோடு இன்று ஆட்சி அமைத்துள்ளார். இக்கட்டான அரசியல் சூழலில் ஆளுநரின் அழைப்பைப் பெற்று இன்று அரியணை ஏறிய விஜய்க்கு, சீமானின் இந்த வாழ்த்து அரசியல் வட்டாரத்தில் முக்கியத்துவம் வாய்ந்ததாகப் பார்க்கப்படுகிறது. இருவரும் ‘தமிழ் தேசியம்’ சார்ந்த சில கருத்துகளில் ஒன்றுபடுவதால், வரும் நாட்களில் புதிய அரசுக்கு நாம் தமிழர் கட்சி ஆக்கப்பூர்வமான ஒத்துழைப்பை வழங்கும் என எதிர்பார்க்கப்படுகிறது.
சென்னை ஜவஹர்லால் நேரு உள்விளையாட்டு அரங்கில் நடைபெற்ற இந்த விழாவில் விஜய்யின் குடும்பத்தினர், திரைத்துறையினர் மற்றும் முக்கிய அரசியல் தலைவர்கள் பங்கேற்றனர். ஆளுநர் ராஜேந்திர விஸ்வநாத் அர்லேகர் பதவிப் பிரமாணம் செய்து வைத்தார். “லேட்டா வந்தாலும் லேட்டஸ்டாக” சீமான் தனது வாழ்த்துகளைப் பதிவு செய்திருந்தாலும், சமூக வலைதளங்களில் தவெக மற்றும் நாம் தமிழர் கட்சித் தொண்டர்கள் இந்தப் பதிவை அதிகளவில் பகிர்ந்து வருகின்றனர். தமிழகத்தின் புதிய அரசியல் பயணத்திற்குப் பலரும் வாழ்த்து மழை பொழிந்து வரும் வேளையில், சீமானின் இந்த வாழ்த்து ‘அண்ணன் – தம்பி’ பாசத்தை மீண்டும் உறுதி செய்துள்ளது.
