அலாஸ்காவில் திரவமாக்கப்பட்ட இயற்கை எரிவாயு (LNG) திட்டம் தொடர்பாக தென் கொரியா மற்றும் அமெரிக்கா இடையே ஒப்பந்தம் எட்டப்பட்டுள்ளதாக அமெரிக்க அதிபர் டொனால்ட் டிரம்ப் தெரிவித்திருந்தார். ஆனால், வெளியிட்ட தகவலின்படி, 54 பில்லியன் டாலர் மதிப்பிலான இத்திட்டத்தில் தென் கொரியா முதலீடு செய்ய ஒப்புக்கொண்டதாகக் கூறப்படும் செய்தியை தென் கொரிய வர்த்தக அமைச்சகம் மறுத்துள்ளது. இத்திட்டம் வர்த்தக ரீதியாக சாத்தியமானது தானா என்பது குறித்து இன்னும் ஆய்வு செய்யப்படவில்லை என்றும், முதலீடு குறித்து எந்த முடிவும் எட்டப்படவில்லை என்றும் தென் கொரியா விளக்கம் அளித்துள்ளதாகத் தெரிவிக்கப்படுகிறது.
அமெரிக்க வணிகச் செயலாளர் ஹோவர்ட் லூட்னிக்கிடம் இது குறித்துப் பேசிய தென் கொரிய வர்த்தக அமைச்சர் கிம் ஜங்-க்வான், இரு நாடுகளுக்கு இடையே ஒப்புக்கொள்ளப்பட்ட எல்லைக்கு அப்பாற்பட்டு டிரம்ப் கருத்து தெரிவித்துள்ளதற்குத் தனது வருத்தத்தைப் பதிவு செய்துள்ளதாகக் கூறியுள்ளார். இத்திட்டம் பொருளாதார ரீதியாகவும் சட்ட ரீதியாகவும் தென் கொரியாவிற்கு சாதகமாக அமைந்தால் மட்டுமே அடுத்தகட்ட நடவடிக்கைகள் எடுக்கப்படும் என்று தென் கொரிய அரசு திட்டவட்டமாகக் குறிப்பிட்டுள்ளது. எவ்வாறாயினும், அலாஸ்கா எரிவாயுத் திட்டத்தின் மூலம் அமெரிக்கா மற்றும் தென் கொரியா இடையிலான வர்த்தக உறவுகள் மேலும் விரிவடையும் என டிரம்ப் தரப்பில் நம்பிக்கையுடன் கூறப்பட்டு வருகிறது.
தற்போது அலாஸ்கா இயற்கை எரிவாயு திட்டத்தின் பொருளாதார சாத்தியக்கூறுகள் குறித்து இரு நாட்டு அதிகாரிகளும் தொடர்ந்து பேச்சுவார்த்தை நடத்தி வருவதாகக் கூறப்படுகிறது. தென் கொரிய அரசின் முறையான வர்த்தக மதிப்பீட்டிற்கு பிறகே இத்திட்டத்தில் அந்நாடு பங்கேற்குமா அல்லது விலகுமா என்பது தெரியவரும் என எதிர்பார்க்கப்படுகிறது.
