தமிழகச் சட்டமன்றத் தேர்தல் 2026-க்கான மாநிலம் முழுவதும் தபால் வாக்குகள் எண்ணப்பட்டு வரும் நிலையில், சென்னை பெரம்பூர் தொகுதியில் தமிழக வெற்றிக் கழகத்தின் தலைவர் விஜய் (C. Joseph Vijay) தனது போட்டியாளர்களைப் பின்னுக்குத் தள்ளி முன்னிலை பெற்றுள்ளார்.
ஆரம்பக்கட்ட நிலவரப்படி, பெரம்பூரில் எண்ணப்பட்ட தபால் வாக்குகளில் விஜய்யின் கட்சிக்கு அதிக வாக்குகள் கிடைத்துள்ளன. பெரம்பூர் மற்றும் திருச்சி கிழக்கு ஆகிய இரண்டு தொகுதிகளில் விஜய் போட்டியிடும் நிலையில், தலைநகர் சென்னையில் அவர் பெற்றுள்ள இந்தத் தொடக்க நிலை முன்னிலை தவெக தொண்டர்களிடையே பெரும் உற்சாகத்தை ஏற்படுத்தியுள்ளது.
பெரம்பூர் தொகுதியில் திமுக சார்பில் ஆர்.டி.சேகர் மற்றும் நாம் தமிழர் கட்சி சார்பில் வெற்றித் தமிழன் உள்ளிட்ட முக்கிய வேட்பாளர்கள் களம் கண்டுள்ள நிலையில், தபால் வாக்குகளில் விஜய் முன்னிலை வகிப்பது அரசு ஊழியர்கள் மற்றும் ஆசிரியர்கள் மத்தியில் அவருக்கு இருக்கும் ஆதரவைக் காட்டுவதாகக் கருதப்படுகிறது. தபால் வாக்கு எண்ணிக்கை முடிந்தவுடன் மின்னணு வாக்குப்பதிவு இயந்திரங்களில் (EVM) உள்ள வாக்குகள் எண்ணப்பட உள்ளன. நகர்ப்புற வாக்காளர்கள் அதிகமுள்ள பெரம்பூரில் இந்த மும்முனைப் போட்டி இறுதிவரை விறுவிறுப்பாக இருக்கும் என்று எதிர்பார்க்கப்படுகிறது. தேர்தல் ஆணையத்தின் அதிகாரப்பூர்வ அறிவிப்புகள் ஒவ்வொரு சுற்றின் முடிவிலும் உடனுக்குடன் வெளியிடப்பட்டு வருகின்றன.
