மத்திய கிழக்கில் அதிகரித்து வரும் பிராந்தியப் பதற்றங்கள் மற்றும் போர்ப் பதற்றங்களுக்கு இடையே, ஈரானுடனான அனைத்து வர்த்தக உறவுகள், வர்த்தகப் பரிமாற்றங்கள் மற்றும் நிதிப் பரிவர்த்தனைகளைத் தற்காலிகமாக இடைநிறுத்துவதாக ஐக்கிய அரபு அமீரகம் (UAE) அதிரடியாக அறிவித்துள்ளது. ஹார்முஸ் நீரிணை மற்றும் அமீரகக் கடற்பகுதியில் கப்பல்கள் மீது நடத்தப்பட்ட ஏவுகணைத் தாக்குதல்களைத் தொடர்ந்து, பாதுகாப்பு காரணங்களுக்காக இந்த நடவடிக்கை எடுக்கப்பட்டுள்ளதாக அறிக்கைகள் தெரிவிக்கின்றன.
ஈரானைப் பொறுத்தவரை ஐக்கிய அரபு அமீரகம் என்பது வெறுமனே ஒரு பக்கத்து நாடு மட்டுமல்ல, அமெரிக்கப் பொருளாதாரத் தடைகளுக்கு மத்தியிலும் உலக வர்த்தகச் சந்தையுடன் இணைந்திருக்க உதவிய மிக முக்கிய நிதி மற்றும் வணிக வாசலாகத் திகழ்ந்தது. ஆண்டிற்குச் சுமார் 27 முதல் 30 பில்லியன் டாலர் மதிப்பிலான வர்த்தகம் இவ்விரு நாடுகளுக்கு இடையே நடைபெற்று வந்த சூழலில், இந்தத் திடீர் வர்த்தக முடக்கம் ஈரானின் வர்த்தக விநியோகச் சங்கிலியை நேரடியாக முடக்கும் நிலையை உருவாக்கியுள்ளது.
ஈரானின் மொத்த இறக்குமதியில் சுமார் 30 சதவீதத்திற்கும் அதிகமான பொருட்கள் ஐக்கிய அரபு அமீரகத்தில் உள்ள டுபாய் போன்ற வணிக நகரங்கள் வழியாகவே மறு-ஏற்றுமதி (Re-export) செய்யப்பட்டு வந்தன. தற்போது இந்த வழித்தடம் முற்றிலும் அடைக்கப்பட்டுள்ளதால், ஈரானில் அத்தியாவசியப் பொருட்கள், உணவு தானியங்கள் மற்றும் மின்னணு சாதனங்களின் இறக்குமதி பாதிக்கப்பட்டு, அந்நாட்டின் பணவீக்கம் மற்றும் நாணய வீழ்ச்சி மேலும் மோசமடையும் என்று பொருளாதார வல்லுநர்கள் எச்சரிக்கின்றனர்.
அமெரிக்கா ஈரான் மீது ‘பொருளாதாரப் போர்’ அறிவித்துத் தீவிரக் கட்டுப்பாடுகளை விதித்து வரும் அதே தருணத்தில், அமீரகத்தின் இந்த நடவடிக்கை ஈரானை சர்வதேச அளவில் நிதி ரீதியாகத் தனிமைப்படுத்தும் அமெரிக்காவின் முயற்சிகளுக்கு மேலும் வலுசேர்ப்பதாக அமைந்துள்ளது. பிராந்திய அமைதி திரும்பும் வரை இந்தத் தடை தொடரும் எனத் தெரிவிக்கப்பட்டுள்ளதால், நிலைகுலைந்துள்ள ஈரானியப் பொருளாதாரம் இந்த நெருக்கடியை எவ்வாறு எதிர்கொள்ளப் போகிறது என்பது கேள்விக்குறியாகியுள்ளது.
