லண்டன்: வரலாற்றுச் சிறப்புமிக்க 950 ஆண்டுகள் பழமையான ‘பேயக்ஸ் தையல் கலைப்படைப்பை’ (Bayeux Tapestry) இங்கிலாந்திற்குப் பிரான்ஸ் கடனாக வழங்கியுள்ள நிலையில், இங்கிலாந்துப் பிரதமராகப் பொறுப்பேற்றுள்ள ஆண்டி பர்ன்ஹாம் மற்றும் பிரெஞ்சு அதிபர் எமானுவேல் மேக்ரான் இடையே லண்டனில் நடைபெற்ற உயர்மட்டச் சந்திப்பில் இருநாடுகளுக்கும் இடையிலான எல்லைப் பாதுகாப்பு ஒப்பந்தங்கள் தீவிரப்படுத்தப்பட்டுள்ளன.
ஆங்கிலக் கால்வாய் வழியாக இங்கிலாந்திற்குள் நுழையும் சட்டவிரோதச் சிறிய படகுகளைத் தடுப்பதற்காகப் பிரெஞ்சுக் கடற்கரையோரங்களில் கூடுதல் காவல்துறையினரைப் பணியமர்த்தப் பிரான்ஸ் ஒப்புக்கொண்டுள்ளது.
பிரிட்டிஷ் அருங்காட்சியகத்தில் வைக்கப்பட்டுள்ள இந்த வரலாற்றுப் புகழ்பெற்ற தையல் கலைப்படைப்பை பார்வையிட்டப் பிறகு, டவுனிங் வீதியில் நடைபெற்ற பேச்சுவார்த்தையின் போது, பிரான்ஸின் மேற்குப் பகுதி கடற்கரைகளில் புதிதாக 45 சிறப்புப் பிரிவு காவல்துறையினர் ரோந்துப் பணியில் ஈடுபடுத்தப்படுவார்கள் என அறிவிக்கப்பட்டது.
இதன் மூலம் சிறிய படகுகள் மற்றும் பெரிய வகை டிங்கி படகுகள் மூலம் அகதிகள் இங்கிலாந்து நோக்கி அனுப்பப்படுவதை முன்கூட்டியே தடுத்து நிறுத்த முடியும் என இரு தலைவர்களும் நம்பிக்கை தெரிவித்துள்ளனர்.
இந்த எல்லைப் பாதுகாப்பு திட்டங்களுக்காகப் பிரிட்டிஷ் அரசு ஆண்டிற்கு சுமார் £662 மில்லியன் பவுண்டுகள் வரை செலவிட்டு வரும் நிலையில், பிரான்ஸ் தரப்பில் புதிதாக 45 அதிகாரிகளை மட்டுமே கூடுதலாகப் பணியமர்த்துவது போதுமானது அல்ல என்ற விமர்சனங்களும் எழுந்துள்ளன. இருப்பினும், பிரான்ஸ் உடனான கூட்டாண்மை மற்றும் எல்லை கண்காணிப்பு நடவடிக்கைகள் காரணமாக இந்த கோடைகாலத்தில் சட்டவிரோதப் படகுகளின் வருகை கடந்த 7 ஆண்டுகளில் இல்லாத அளவிற்கு மிகக் குறைந்த மட்டத்திற்கு வீழ்ச்சியடைந்துள்ளதாகப் பிரதமர் ஆண்டி பர்ன்ஹாம் சுட்டிக்காட்டியுள்ளார்.
பிரெக்ஸிட் நடைமுறைக்குப் பிறகு ஐரோப்பிய ஒன்றிய நாடுகளுடனான வர்த்தக மற்றும் பாதுகாப்பு உறவுகளை வலுப்படுத்த இங்கிலாந்து முயன்று வரும் சூழலில், பிரெஞ்சு அதிபர் மேக்ரானின் இந்த லண்டன் வருகை மிக முக்கியமானதாகப் பார்க்கப்படுகிறது. கடத்தல் கும்பல்களின் புதிய உத்திகளை முறியடிக்க இங்கிலாந்து மற்றும் பிரெஞ்சு படைகள் இணைந்து செயல்படும் அதேவேளையில், மனிதக் கடத்தல்காரர்களைக் கைது செய்யவும், உபகரணங்களைப் பறிமுதல் செய்யவும் பிரான்ஸின் வடக்கு கடற்கரையோரப் பகுதிகளில் மேலும் கூடுதல் பாதுகாப்புப் படைகள் குவிக்கப்படவுள்ளன.
