உக்ரைன் – ரஷ்யா இடையே தொடர்ந்து தீவிரமடைந்து வரும் போரில், தற்போது பிரிட்டன் தயாரித்த ட்ரோன்களைப் பயன்படுத்தி ரஷ்ய நிலப்பரப்பிற்குள் உக்ரைன் ராணுவம் மிகக் கடுமையான தாக்குதல்களை நடத்தியுள்ளது. ரஷ்யாவில் உள்ள எண்ணெய் சுத்திகரிப்பு ஆலைகள் மற்றும் முக்கிய ராணுவ உள்கட்டமைப்புகளை இலக்கு வைத்து இந்த பிரிட்டன் ட்ரோன்கள் வீசப்பட்டதாக தகவல்கள் வெளியாகி அதிர்ச்சியை ஏற்படுத்தியுள்ளன. ரஷ்ய மண்ணில் நேரடியாக தாக்குதல் நடத்த மேலைநாடுகளின் ஆயுதங்கள் பயன்படுத்தப்பட்டிருப்பது, இந்த போரை அடுத்தகட்டப் பதற்றத்திற்கு தள்ளியுள்ளது.
இந்த தாக்குதலைத் தொடர்ந்து, லண்டனில் உள்ள ரஷ்ய தூதரகம் பிரிட்டனுக்கு மிகக் கடுமையான எச்சரிக்கையை விடுத்துள்ளது. “பிரிட்டன் திட்டமிட்டே இந்த போரை தீவிரமாக்க முயல்கிறது. அமைதி பேசுவதாக நாடகமாடும் லண்டன், உக்ரைனின் இந்த செயலுக்கு மிக அதிக விலை கொடுக்க வேண்டியிருக்கும்” என ரஷ்யா தெரிவித்துள்ளது. விளாடிமிர் புடினின் உத்தரவின் பேரில் ரஷ்ய உளவு அமைப்புகள் பிரிட்டன் மற்றும் ஐரோப்பிய நாடுகளுக்கு எதிராக பெரிய அளவிலான மறைமுக தாக்குதல்களுக்கு (Hybrid Warfare) திட்டமிட்டு வருவதாக சர்வதேச பாதுகாப்பு நிபுணர்கள் கருதுகின்றனர்.
ஐரோப்பிய நாடுகளில் ரஷ்ய உளவுத்துறை (GRU) ஏற்கனவே பல சதி வேலைகளில் ஈடுபட்டு வருவதாக நேட்டோ மற்றும் மேலைநாட்டு உளவு அமைப்புகள் குற்றம்சாட்டுகின்றன. முக்கிய ரயில்வே பாதைகளை சேதப்படுத்துதல், முக்கியமான உள்கட்டமைப்புகள் மீது தீவைப்பு தாக்குதல்கள், வான்வழி மற்றும் ஜிபிஎஸ் (GPS) செயற்கைக்கோள் சமிக்ஞைகளை முடக்குதல் மற்றும் உயர் அதிகாரிகளை இலக்கு வைக்கும் திட்டங்கள் என ரஷ்யாவின் உளவு நெட்வொர்க் ஐரோப்பா முழுவதும் தீவிரமாக செயல்பட்டு வருகிறது. இதன் மூலம் நேரடியாக போர் பிரகடனம் செய்யாமல், பிரிட்டன் உள்ளிட்ட நாடுகளின் உள்நாட்டு பாதுகாப்பை சீர்குலைக்க புடின் முயல்வதாகக் கூறப்படுகிறது.
ரஷ்யாவின் இந்த மிரட்டல்களுக்கு பிரிட்டன் பாதுகாப்பு அமைச்சகம் உடனடியாக பதிலடி கொடுத்துள்ளது. “உக்ரைனின் சுயபாதுகாப்பிற்கு தேவையான உதவிகளை பிரிட்டன் தொடர்ந்து வழங்கும், ரஷ்ய அச்சுறுத்தல்களுக்கு பிரிட்டனும் அதன் தோழமை நாடுகளும் ஒருபோதும் பயப்படாது” என பிரிட்டன் உறுதிபடத் தெரிவித்துள்ளது. இருப்பினும், ரஷ்யாவின் இந்த மறைமுக சதி திட்டங்கள் மற்றும் சைபர் தாக்குதல்கள் மேலைநாடுகளின் இயல்பு வாழ்க்கையை முடக்கும் அபாயத்தை ஏற்படுத்தியுள்ளதால், ஐரோப்பிய கண்டம் முழுவதும் தற்போது கடும் பாதுகாப்பு எச்சரிக்கை விடுக்கப்பட்டுள்ளது.
