மதுராந்தகம் பிரச்சாரப் பயணத்தின் போது வழியில் அமைந்திருந்த மறைந்த முன்னாள் முதலமைச்சர் எம்.ஜி.ஆரின் உருவச்சிலைக்குத் தவெக தலைவர் விஜய் மாலை அணிவித்த போது, சிலையின் ‘இரட்டை விரல்’ சின்னத்தைக் காட்டும் கைப் பகுதியை மட்டும் துணியால் மறைத்து மாலை அணிவித்ததாகக் கூறி அதிமுகவினர் இணையத்தில் கடும் கண்டனங்களைப் பதிவு செய்து வருகின்றனர்.
செங்கல்பட்டு மாவட்டம் மதுராந்தகத்தில் நடைபெற்ற இடைத்தேர்தல் பிரச்சாரப் பொதுக்கூட்டத்தில் பங்கேற்பதற்காகச் சென்ற தவெக தலைவர் விஜய், செல்லும் வழியில் சாலையோரம் அமைந்திருந்த எம்.ஜி.ஆரின் முழு உருவச்சிலைக்கு மாலை அணிவித்து மரியாதை செலுத்தினார். அப்போது, எம்.ஜி.ஆர் தனது வழக்கமான இரட்டை விரல்களைக் காட்டி நிற்கும் கைப் பகுதியைத் துணியால் மூடி மறைத்தவாறு மாலை தொங்கவிடப்பட்டிருந்தது சமூக வலைதளங்களில் வெளியான புகைப்படங்கள் மற்றும் வீடியோக்கள் மூலம் தெரியவந்தது.
இந்தக் காட்சிகளைச் சமூக வலைதளங்களில் பகிர்ந்து வரும் அதிமுக தொண்டர்களும் ஆதரவாளர்களும், “எம்.ஜி.ஆரின் அடையாளமான இரட்டை விரல் சின்னத்தைப் பார்த்துப் பயந்துதான் அவரது கையைத் துணியால் மறைத்து மாலை அணிவித்துள்ளனரா?” என்று கேள்வி எழுப்பிக் கடுமையாக விமர்சித்து வருகின்றனர். எம்.ஜி.ஆருக்கு மரியாதை செலுத்துவதாகக் கூறிக்கொண்டு அவரது வரலாற்றுச் சிறப்புமிக்க அடையாளத்தை மறைப்பது ஏற்புடையதல்ல என்றும் அதிமுகவினர் கொந்தளித்து கருத்துகளைப் பதிவிட்டு வருகின்றனர்.
அதேவேளையில், இச்சம்பவம் குறித்து விளக்கமளித்துள்ள தவெக நிர்வாகிகள், “நீளமான மாலையைச் சிலைக்கு அணிவிக்கும் போது தற்செயலாக அது கையின் மீது விழுந்து மறைத்ததே தவிர, திட்டமிட்டு எந்த உள்நோக்கத்துடனும் அப்படிச் செய்யப்படவில்லை. எம்.ஜி.ஆர் மீது தலைவர் விஜய்க்கு என்றும் தனி மரியாதை உண்டு” எனக் கூறி சர்ச்சைக்கு முற்றுப்புள்ளி வைக்க முயன்று வருகின்றனர். இருப்பினும், இடைத்தேர்தல் நேரத்தில் இந்த விவகாரம் இணையத்தில் திமுக, அதிமுக மற்றும் தவெக தொண்டர்களிடையே காரசாரமான விவாதப் பொருளாக மாறியுள்ளது.
