தமிழக வெற்றிக் கழகத்தின் தலைவர் விஜய் கோயம்புத்தூர் மற்றும் திருப்பூர் மாவட்டங்களில் மேற்கொண்ட ரோடு ஷோ மற்றும் பிரச்சாரக் கூட்டத்தில், கட்டுக்கடங்காத மக்கள் கூட்டத்தால் பெரும் பரபரப்பு ஏற்பட்டது. ஏற்கனவே கரூரில் நடந்த கூட்டத்தில் கூட்ட நெரிசல் ஏற்பட்ட நிலையில், தற்போது இந்த ரோடு ஷோவில் வேட்பாளர் உட்பட 30-க்கும் மேற்பட்டோர் அடுத்தடுத்து மயங்கி விழுந்த சம்பவம் தமிழகத்தையே அதிரவைத்துள்ளது. விஜய்யைக் காண்பதற்காகத் திரண்ட ஆயிரக்கணக்கான தொண்டர்களின் ஆரவாரமும், ஒருவரை ஒருவர் முண்டியடித்த நெரிசலும் அந்த இடத்தையே ஒரு போர்க்களம் போல மாற்றியது.
கோயம்புத்தூர் விமான நிலையத்திலிருந்து பிரச்சார வாகனத்தில் புறப்பட்ட விஜய்யை வரவேற்க, சுட்டெரிக்கும் வெயிலையும் பொருட்படுத்தாமல் காலை 11 மணி முதலே தொண்டர்கள் காத்திருந்தனர். சூலூர் தொகுதியின் தவெக வேட்பாளர் சுகுமாரன் கணியூர் சுங்கச்சாவடி அருகே ஆயிரக்கணக்கான தொண்டர்களுடன் விஜய்யை வரவேற்கத் தயாராக நின்றார். விஜய் அங்கு வந்தடைந்த போது, அவரை ஒருமுறை பார்த்துவிட வேண்டும் என்ற ஆவலில் தொண்டர்கள் முண்டியடித்த நெரிசலில் சிக்கிய வேட்பாளர் சுகுமாரன், மூச்சுத்திணறல் ஏற்பட்டு திடீரென மயக்கமடைந்தார். உடனடியாக கட்சியினர் அவரை மீட்டு முகத்தில் தண்ணீர் தெளித்து முதலுதவி சிகிச்சை அளித்தனர்.
சூலூர் பகுதியைத் தொடர்ந்து அவினாசிக்கு விஜய் வருகை தந்தபோது, பல மணி நேரம் கடும் வெயிலில் காத்திருந்த தொண்டர்கள் அடுத்தடுத்து நிலைகுலைந்து சரிந்தனர். அங்கு மட்டும் 9 பேர் மயக்கமடைந்த நிலையில், அவர்கள் உடனடியாக மீட்கப்பட்டு ஆம்புலன்ஸ் மூலம் மருத்துவமனைக்குக் கொண்டு செல்லப்பட்டனர். கூட்ட நெரிசலில் மூன்று குழந்தைகள் காணாமல் போனது பெரும் பதற்றத்தை ஏற்படுத்திய நிலையில், அதிர்ஷ்டவசமாகப் போலீசார் அவர்களை மீட்டுப் பெற்றோரிடம் ஒப்படைத்தனர். எங்குப் பார்த்தாலும் மக்கள் வெள்ளமாகத் தெரிந்த அவினாசி பகுதி, பாதுகாப்புப் படையினருக்குப் பெரும் சவாலாக அமைந்தது.
திருப்பூர் பெருமாநல்லூரில் மாலை 4 மணி அளவில் விஜய் பேசவிருந்த நிலையில், மதியம் 12 மணி முதலே சுமார் 20,000-க்கும் மேற்பட்டோர் அங்கு குவிந்தனர். திறந்தவெளி மைதானத்தில் நிலவிய கடும் வெப்பம் மற்றும் போதிய இடவசதி இல்லாத நெருக்கடியால், அங்கு ஒரே நேரத்தில் 20-க்கும் மேற்பட்டோர் மயங்கி விழுந்தனர். அடுத்தடுத்து ஆம்புலன்ஸ்கள் வந்து சென்றதும், தொண்டர்கள் ஒருவருக்கொருவர் உதவி செய்ததும் காண்போரை நெகிழ வைத்த அதே வேளையில், பாதுகாப்பு ஏற்பாடுகள் குறித்துக் கடுமையான கேள்விகளையும் எழுப்பியுள்ளது. விஜய்யின் வருகை பெரும் வரவேற்பைப் பெற்றிருந்தாலும், இத்தனை பேர் மயக்கமடைந்த சம்பவம் அரசியல் வட்டாரத்தில் பெரும் விவாதத்தை ஏற்படுத்தியுள்ளது.
