118 என்ற எண்ணைப் பெற எல்லார் கால்களையும் பிடிக்க வேண்டுமா ? என விஜய் தனது நிர்வாகிகள் மத்தியில் கேள்வி எழுப்பியுள்ளார். இதனை அடுத்து விஜய் புது தேர்தல் ஒன்றை சந்திக்க விரும்புவதாகவும். மக்கள் ஆணையை முழுமையாக பெற்று ஆட்சியமைக்க முடியும் என்று பேசி இருக்கிறார்.
தமிழக சட்டமன்றத் தேர்தல் முடிவுகளுக்குப் பிறகு நிலவி வரும் அரசியல் இழுபறி தற்போது உச்சகட்டத்தை எட்டியுள்ளது. 108 இடங்களை வென்று தனிப்பெரும் கட்சியாக உருவெடுத்த போதிலும், ஆட்சி அமைக்கத் தேவையான 118 இடங்களை நிரூபிப்பதில் ஆளுநர் தரப்பில் சில முட்டுக்கட்டைகள் போடப்பட்டு வருகின்றன. இந்நிலையில், இன்று மாலைக்குள் இந்த விவகாரத்தில் தெளிவான ஒரு முடிவு எடுக்கப்படாவிட்டால், தான் மீண்டும் மக்களிடமே சென்று நீதி கேட்கப் போவதாகத் தமிழக வெற்றி கழகத் தலைவர் விஜய் மிகக் காட்டமாகத் தெரிவித்துள்ளார்.
ஆளுநர் அர்லேக்கர் தொடர்ந்து பெரும்பான்மையை நிரூபிக்க வலியுறுத்தி வருவதும், இதற்கிடையில் எதிர்க்கட்சிகளின் குதிரை பேரம் குறித்த அச்சமும் அரசியல் வட்டாரத்தில் பெரும் பதற்றத்தை உருவாக்கியுள்ளது. குறிப்பாக, டிடிவி தினகரன் மற்றும் எடப்பாடி பழனிசாமி தரப்பில் முன்வைக்கப்படும் புகார்கள், ஆளுநரின் முடிவில் தாக்கத்தை ஏற்படுத்துவதாகத் தவெக தரப்பினர் கருதுகின்றனர். இதனால், ஜனநாயக முறைப்படி மக்கள் அளித்த தீர்ப்பை அவமதிக்கும் செயல்களை இனியும் பொறுத்துக் கொள்ள முடியாது என விஜய் தனது நிலைப்பாட்டை உறுதி செய்துள்ளார்.
காங்கிரஸ் மற்றும் கம்யூனிஸ்ட் கட்சிகள் ஏற்கனவே ஆதரவு கடிதம் வழங்கியுள்ள நிலையில், இன்று மாலை விசிக-வின் இறுதி முடிவுக்காக ஒட்டுமொத்த தமிழகமும் காத்திருக்கிறது. ஆளுநர் மாளிகையிலிருந்து சாதகமான பதில் வராத பட்சத்தில், நீதிமன்றத்தை நாடுவது ஒருபுறம் இருந்தாலும், பொதுக்கூட்டங்கள் வாயிலாக நேரடியாக மக்களைச் சந்தித்து தற்போதைய அரசியல் சூழ்ச்சிகளை விளக்குவதே சரியான தீர்வாக இருக்கும் என்று விஜய் தனது நிர்வாகிகளிடம் ஆலோசனை நடத்தியுள்ளார்.
தமிழகத்தில் ஆளுநர் ஆட்சி அல்லது குடியரசுத் தலைவர் ஆட்சி அமல்படுத்தப்படலாம் என்ற யூகங்கள் நிலவி வரும் வேளையில், விஜய்யின் இந்த “மக்களிடம் செல்வேன்” என்ற அறிவிப்பு டெல்லி வரை அதிர்வலைகளை ஏற்படுத்தியுள்ளது. இனியும் காலதாமதம் செய்வது தமிழகத்தின் அரசியல் ஸ்திரத்தன்மையைப் பாதிக்கும் என்பதால், இன்று இரவு நடக்கும் ஆளுநர் சந்திப்பிற்குப் பிறகு தமிழகத்தின் அடுத்த முதலமைச்சர் யார் என்பது குறித்த இறுதித் தகவல் வெளியாகும் என எதிர்பார்க்கப்படுகிறது.
