உக்ரைனின் முக்கியமான தகவல் தொடர்பு கட்டமைப்பு மற்றும் தரவு மையங்களை (Data Centres) இலக்கு வைத்து ரஷிய ராணுவம் தீவிர வான்வழித் தாக்குதல்களை நடத்தியுள்ள நிலையில், “ரஷியாவைப் பொறுத்தவரை சாதாரண மக்களின் அன்றாட வாழ்க்கையே ஒரு இலக்குதான்” என்று உக்ரைன் அதிபர் வோலோடிமிர் ஜெலென்ஸ்கி கடுமையாகச் சாடியுள்ளார்.
உக்ரைனின் முக்கிய நகரங்களில் உள்ள டிஜிட்டல் தொழில்நுட்ப உள்கட்டமைப்புகள், வங்கிச் சேவைகள் மற்றும் அரசு நிர்வாகத் தரவுகளைச் சேமித்து வைக்கும் முக்கியத் தரவு மையங்களைக் குறிவைத்து ரஷியப் படைகள் ஏவுகணைகள் மற்றும் ட்ரோன்கள் மூலம் அடுத்தடுத்து தாக்குதல்களைத் தொடுத்துள்ளன. இத்தாக்குதலால் நாட்டின் பல்வேறு பகுதிகளில் டிஜிட்டல் சேவைகள் மற்றும் தகவல்தொடர்பு அமைப்புகள் தற்காலிகமாகப் பாதிக்கப்பட்டன.
இத்தாக்குதல்கள் குறித்துத் தனது வழக்கமான இரவு நேர வீடியோ உரையில் பேசிய உக்ரைன் அதிபர் ஜெலென்ஸ்கி, “ரஷியா வெறும் ராணுவ இலக்குகளை மட்டும் தாக்கவில்லை; உக்ரைன் மக்களின் அன்றாட இயல்பு வாழ்க்கையை முடக்குவதையே முதன்மை நோக்கமாகக் கொண்டுள்ளது. எங்களின் டிஜிட்டல் கட்டமைப்புகள் மற்றும் அமைதியான வாழ்வாதாரங்களைச் சீர்குலைக்க மாஸ்கோ முயல்கிறது” என்று குற்றம் சாட்டினார்.
மேலும், ரஷியாவின் இந்த உள்கட்டமைப்பு சார்ந்த நாசவேலைகளை எதிர்கொள்ள உக்ரைனுக்குக் வான்வழிப் பாதுகாப்பு ஏவுகணைகள் மற்றும் டிஜிட்டல் பாதுகாப்புத் தொழில்நுட்ப உதவிகளை மேற்கத்திய நாடுகள் உடனடியாக அதிகரிக்க வேண்டும் என்றும் அவர் கோரிக்கை விடுத்தார். போர்க்களத்தில் பின்னடைவைச் சந்தித்து வரும் ரஷியா, இதுபோன்று பொதுமக்கள் பயன்பாட்டில் உள்ள டிஜிட்டல் மையங்களைக் குறிவைப்பது மனிதநேயற்ற செயல் என சர்வதேச சமூகம் கண்டித்துள்ளது.
