ரஷ்யாவின் கட்டுப்பாட்டில் உள்ள கிரீமியா தீபகற்பத்தின் மீது உக்ரைன் ராணுவம் நூற்றுக்கணக்கான ஆளில்லா விமானங்கள் (Drones) மூலம் ஒரே நேரத்தில் மிகப்பெரிய வான்வழித் தாக்குதலை (Drone Blitz) நடத்தியுள்ளது. இந்த திடீர் தாக்குதலில் கிரீமியாவின் முக்கியப் பகுதிகளான கெர்ச் (Kerch), செவஸ்டோபோல் (Sevastopol) மற்றும் சிம்ஃபெரோபோல் ஆகிய இடங்களில் உள்ள ரஷ்ய ராணுவ நிலைகள் மற்றும் எரிபொருள் சேமிப்புக் கிடங்குகள் கடுமையாகச் சேதமடைந்துள்ளன. இந்த கோரமான தாக்குதலில் 4 பேர் உயிரிழந்ததாகவும், 28 பேர் படுகாயமடைந்ததாகவும் கிரீமியாவின் ரஷ்ய ஆதரவு கவர்னர் செர்ஜி அக்சியோனோவ் அதிகாரப்பூர்வமாகத் தெரிவித்துள்ளார்.
உக்ரைனின் இந்த அதிநவீன இடைவிடாத ட்ரோன் தாக்குதலால், ரஷ்ய அதிபர் விளாடிமிர் புதினின் முக்கியப் பாதுகாப்பு அரணாகக் கருதப்படும் கிரீமியா தீபகற்பம் முற்றிலும் ஸ்தம்பிக்க வைக்கப்பட்டுள்ளது. தாக்குதலின் தீவிரத்தால், ரஷ்யாவையும் கிரீமியாவையும் இணைக்கும் மிக முக்கியப் போக்குவரத்துப் பாதையான ‘கெர்ச் பாலம்’ (Kerch Bridge) பாதுகாப்புக் காரணங்களுக்காக 9 மணி நேரத்திற்கும் மேலாக முழுமையாக மூடப்பட்டது. இதன் காரணமாக 11-க்கும் மேற்பட்ட பயணிகள் மற்றும் சரக்கு ரயில்களின் போக்குவரத்து முற்றிலும் முடங்கி, ரஷ்ய ராணுவத்திற்கான விநியோகச் சங்கிலி (Supply Chain) கடுமையாகப் பாதிக்கப்பட்டுள்ளது.
இந்தத் தாக்குதலின் மிக முக்கியமான விளைவாக, கிரீமியா முழுவதும் வரலாறு காணாத கடுமையான எரிபொருள் பற்றாக்குறை ஏற்பட்டுள்ளது. நிலைமையைக் கட்டுக்குள் கொண்டு வர, பொதுமக்களுக்கும் தனியார் நிறுவனங்களுக்கும் பெட்ரோல், டீசல் உள்ளிட்ட எரிபொருட்களை விற்பனை செய்ய ரஷ்ய ஆக்கிரமிப்பு அரசு அதிரடியாகத் தடை விதித்துள்ளது. இனிவரும் நாட்களுக்கு அவசரத் தேவை மற்றும் அரசு பாதுகாப்புப் படையினருக்கு மட்டுமே எரிபொருள் வழங்கப்படும் என அறிவிக்கப்பட்டுள்ளதால், அங்குள்ள மக்கள் கடும் அதிர்ச்சியடைந்துள்ளனர். மேலும், மின்சார உள்கட்டமைப்புகள் சேதமடைந்ததால் பல மாவட்டங்கள் இருளில் மூழ்கியுள்ளன.
உக்ரைன் அதிபர் வோலோடிமிர் ஜெலென்ஸ்கி இந்தத் தாக்குதலை உறுதிப்படுத்திப் பேசுகையில், ரஷ்யாவின் எரிசக்தி மற்றும் ராணுவ உள்கட்டமைப்புகளை முடக்குவதற்காக உக்ரைன் தொடுத்துள்ள “நீண்ட தூரத் தடைகளின்” (Long-range sanctions) ஒரு பகுதிதான் இது என்று விவரித்துள்ளார். உக்ரைன் பாதுகாப்புத் துறை அமைச்சகம், இந்த தொடர் ட்ரோன் அழுத்தங்கள் மூலம் விரைவில் கிரீமியாவை ரஷ்யாவின் தொடர்பிலிருந்து முற்றிலும் துண்டித்து, அதை ஒரு தனித்தீவாக மாற்றுவோம் என்று எச்சரித்துள்ளது. இந்த அதிரடித் தாக்குதல், உக்ரைன் போரில் புதின் நிர்வாகத்திற்கு விழுந்த மிகப்பெரிய பின்னடைவாகப் பார்க்கப்படுகிறது.
