தமிழ்நாடு அரசுப் போக்குவரத்துக் கழகத்தின் சார்பில் பொதுமக்களின் பயன்பாட்டிற்காக வாங்கப்பட்டுள்ள 300 புதிய டீசல் மற்றும் சி.என்.ஜி. (CNG) பேருந்துகளின் சேவையை முதலமைச்சர் விஜய் இன்று சென்னை தலைமைச் செயலகத்தில் கொடியசைத்துத் தொடங்கி வைத்தார். அரசுப் போக்குவரத்துக் கழகங்கள் சந்தித்து வரும் நிதி நெருக்கடி மற்றும் கடன் சுமை போன்ற சவால்களுக்கு மத்தியிலும், மக்கள் வசதிக்காக இந்த புதிய பேருந்துகள் பயன்பாட்டிற்குக் கொண்டு வரப்பட்டுள்ளன. சென்னை, கோவை உள்ளிட்ட 7 போக்குவரத்துக் கழகக் கோட்டங்களுக்காக வாங்கப்பட்ட இந்த அதிநவீன பேருந்துகள் சென்னை காமராஜர் சாலையில் அணிவகுத்து நிறுத்தப்பட்டிருந்தன.
பேருந்துச் சேவையைத் தொடங்கி வைத்ததோடு மட்டுமல்லாமல், முதலமைச்சர் விஜய் எதிர்பாராத விதமாகப் பெரம்பூர் நோக்கிச் செல்லக்கூடிய தடம் எண் ‘29ஏ’ அரசுப் பேருந்தில் திடீரென ஏறிப் பயணம் மேற்கொண்டார். பேருந்தின் முன் இருக்கையான நடத்துனர் இருக்கையிலேயே (Conductor Seat) அவர் அமர்ந்து கொண்டது அங்கிருந்த அதிகாரிகளையும் ஊழியர்களையும் நெகிழ வைத்தது. நடத்துனரிடம் “பெரம்பூருக்கு ஒரு டிக்கெட் கொடுங்க..” என்று கேட்டு முறைப்படி பயணச்சீட்டு (Ticket) பெற்றுக்கொண்டு அவர் தனது பயணத்தைத் தொடர்ந்தார்.
தலைமைச் செயலகத்தில் இருந்து காமராஜர் சாலை வழியாகக் கலங்கரை விளக்கம் (Light House) வரை இந்த பேருந்துப் பயணம் நீடித்தது. பயணத்தின் போது, முதலமைச்சர் விஜய் தனது மொபைல் போன் மூலமாகப் பேருந்தின் உள் கட்டமைப்பு மற்றும் சாலையில் அணிவகுத்து நின்ற பிற புதிய பேருந்துகளைத் வீடியோவாகப் பதிவு செய்து கொண்டே சென்றார். அப்போது சாலையோரம் திரண்டிருந்த ஓட்டுநர்கள், நடத்துனர்கள் மற்றும் பொதுமக்களின் வாழ்த்துகளை இன்முகத்தோடு ஏற்று, அவர்களுக்குக் கையசைத்தார். இந்த ஆய்வின் போது போக்குவரத்துத் துறை அமைச்சர் தமிழன் பார்த்திபன் மற்றும் பாதுகாப்பு அதிகாரிகள் உடனிருந்தனர்.
காமராஜர் சாலை ஆய்வு நிறைவடைந்ததும், அந்த பேருந்து மீண்டும் தலைமைச் செயலகத்திற்கு வந்து சேர்ந்தது. அங்கு முதலமைச்சர் விஜய்க்குப் போக்குவரத்துத் துறை சார்பில் அமைச்சர் தமிழன் பார்த்திபன் பூங்கொத்து கொடுத்து சிறப்பான வரவேற்பு அளித்தார். மேலும், இந்த புதிய திட்டத்தின் நினைவாக ஒரு சிறிய ‘மினியேச்சர்’ பேருந்து (Miniature Bus) மாதிரியையும் முதலமைச்சருக்குப் பரிசாக வழங்கினார். புதிய பேருந்துகளின் இயக்கக் கால அட்டவணை மற்றும் பராமரிப்பு குறித்து அதிகாரிகளுடன் ஆலோசனை நடத்திய பின்னர், முதலமைச்சர் தனது அலுவலக அறைக்குச் சென்றார்.
