பிரபல மென்பொருள் நிறுவனமான ‘ஜோஹோ’ (Zoho) அமைப்பாளர் ஸ்ரீதர் வேம்பு, கடந்த திமுக ஆட்சிக் காலத்தில் நிலவிய ஊழல் முறைகேடுகள் குறித்து சமூக வலைத்தளத்தில் வெளியிட்டுள்ள அதிரடிப் பதிவு தமிழக அரசியல் மற்றும் தொழில் துறையினரிடையே பெரும் புயலைக் கிளப்பியுள்ளது. தென்காசியில் ஏழை எளிய கிராமப்புறக் குழந்தைகளுக்குத் தனது ‘கலைவாணி கல்வி மையம்’ (Kalaivani Kalvi Maiyam) அறக்கட்டளை மூலம் முற்றிலும் இலவசக் கல்வியை வழங்கி வருவதாகக் குறிப்பிட்டுள்ள அவர், அந்தப் பள்ளிக்குத் தேவையான கட்டிட அனுமதி பெற கடந்த திமுக அரசிடம் விண்ணப்பித்த போது, பெரும் தொகை லஞ்சமாகக் கேட்கப்பட்டதாகப் பகிரங்கமாகக் குற்றம் சாட்டியுள்ளார்.
இதுகுறித்து தனது எக்ஸ் (X) தளத்தில் விரிவாகப் பதிவிட்டுள்ள ஸ்ரீதர் வேம்பு, “கிராமப்புறக் குழந்தைகளுக்கு முற்றிலும் இலவசமாகக் கல்வி புகட்டும் எங்களது கலைவாணி கல்வி மையத்திற்குப் புதிய கட்டிடங்கள் கட்டத் திட்டமிட்டோம். இதற்காகத் திட்ட மற்றும் கட்டிட அனுமதி (DTCP Approval) கோரி கடந்த திமுக ஆட்சியின் போது முறைப்படி விண்ணப்பித்தோம். ஆனால், பல மாதங்களாக இந்த அனுமதி வழங்கப்படாமல் இழுத்தடிக்கப்பட்டதுடன், ‘பெரிய தொகை’ லஞ்சமாகக் கொடுத்தால் மட்டுமே காரியம் நடக்கும் என்று அதிகாரிகள் தரப்பில் திட்டவட்டமாகக் கூறப்பட்டது; இலவசப் பள்ளி என்று தெரிந்தும் அவர்கள் இரக்கமின்றி லஞ்சம் கேட்டனர்” எனத் தனது ஆதங்கத்தைப் பதிவு செய்துள்ளார்.
தொடர்ந்து, தமிழகத்தில் ஏற்பட்டுள்ள ஆட்சி மாற்றத்தையும், புதிய முதலமைச்சர் சி. ஜோசப் விஜய்யின் நிர்வாகச் சீர்திருத்தங்களையும் அவர் வெகுவாகப் பாராட்டியுள்ளார். “தமிழக வெற்றிக் கழகத்தின் (தவெக) அரசு பதவியேற்றவுடன், முடங்கிக் கிடந்த எங்களது விண்ணப்பங்கள் எந்தவொரு லஞ்சமுமின்றி ஆன்லைன் வாயிலாக மிக வேகமாகவும், தானியங்கி முறையிலும் (Automatically) ஒப்புதல் பெற்றுள்ளன. அதுமட்டுமின்றி, எவ்வித அனுமதிக்கும் யாருக்கும் ஒரு பைசா கூட லஞ்சமாகக் கொடுக்க வேண்டாம் என்று தற்போதைய அரசு அதிகாரிகள் எங்களை அறிவுறுத்தியுள்ளனர். இந்த வெளிப்படையான நிர்வாக மாற்றத்திற்காக முதலமைச்சர் விஜய் அவர்களுக்குப் பகிரங்கமாக நன்றிகளைத் தெரிவித்துக் கொள்கிறேன்” என்று ஸ்ரீதர் வேம்பு குறிப்பிட்டுள்ளார்.
ஸ்ரீதர் வேம்பின் இந்த அதிரடிப் பதிவைத் தொடர்ந்து சமூக வலைத்தளங்களில் திமுக ஆதரவாளர்களுக்கும், தவெக-பாஜக உள்ளிட்ட மாற்றுத் தரப்பினருக்கும் இடையே கடுமையான விவாதப் போர் மூண்டுள்ளது. திமுகவினர் அவரது குற்றச்சாட்டுகளுக்கு முறையான ஆதாரங்கள் இல்லை எனக் கூறி விமர்சித்து வரும் நிலையில், அதற்குப் பதிலடி கொடுத்துள்ள ஸ்ரீதர் வேம்பு, “திமுாக ஆட்சியில் இமயமலை அளவிற்கு ஊழல் மலிந்து கிடந்தது என்பது ஒட்டுமொத்த பிரபஞ்சத்திற்கும் தெரிந்த ரகசியம்” என்று சாடியுள்ளார். மேலும், முன்னாள் நிதியமைச்சர் பழனிவேல் தியாகராஜனின் (PTR) ஆடியோ விவகாரம் மற்றும் கேரள இடதுசாரித் தலைவர்களின் கருத்துகளைச் சுட்டிக்காட்டி, தான் ஒரு தொழில்நுட்பக் கலைஞர் என்றும், சுய அனுபவத்தின் அடிப்படையிலேயே இந்த உண்மைகளைப் பொதுவெளியில் உடைத்துள்ளதாகவும் அவர் ஆவேசமாகத் தெரிவித்துள்ளார்.
