மொனாக்கோவை உலுக்கிய பார்சல் பாம் வெடிப்பு; உக்ரைன் கோடீஸ்வரரைக் குறிவைத்துத் தாக்குதல்… பகீர் வீடியோ வெளியீடு!

உலகின் மிகவும் பாதுகாப்பான மற்றும் கோடீஸ்வரர்கள் வாழும் பணக்கார நுண்-நாடான மொனாக்கோவில் (Monaco), உக்ரைனைச் சேர்ந்த பிரபல தொழிலதிபரும் கோடீஸ்வரருமான வடிம் யெர்மோலேவ் (Vadym Yermolaiev) மற்றும் அவரது குடும்பத்தினரைக் குறிவைத்து நடத்தப்பட்ட கொடூர வெடிகுண்டுத் தாக்குதலின் திகிலூட்டும் வீடியோ காட்சிகள் வெளியாகி சர்வதேச அளவில் பெரும் பரபரப்பை ஏற்படுத்தியுள்ளன. அடுக்குமாடி குடியிருப்பு வாயிலில் வைக்கப்பட்ட பார்சல் குண்டு வெடித்ததில், கோடீஸ்வரர் வடிம் யெர்மோலேவ், அவரது மனைவி மற்றும் 13 வயது மகன் ஆகியோர் படுகாயமடைந்தனர்.

வெளியாகியுள்ள அந்தப் பகீர் வீடியோவில், கருப்பு நிற தொப்பி மற்றும் ஜாக்கெட் அணிந்த மர்ம நபர் ஒருவர், குடியிருப்பின் நுழைவு வாயிலில் வெடிபொருள் அடங்கிய பையை வைத்துவிட்டு தப்பிச் செல்வது பதிவாகியுள்ளது. வடிம் யெர்மோலேவ் தனது மனைவி மற்றும் மகனுடன் வீட்டிற்குள் நுழைய முயன்றபோது, தொலைதூரக் கட்டுப்பாட்டுச் சாதனம் (Remote Control) மூலம் அந்த வெடிகுண்டு வெடிக்கச் செய்யப்பட்டுள்ளது. இந்த சக்திவாய்ந்த குண்டுவெடிப்பில் கோடீஸ்வரரின் மனைவியின் இரு கால்களும் பலத்த சேதமடைந்து அவர் உயிருக்குப் போராடும் நிலையில் மருத்துவமனையில் தீவிர சிகிச்சைப் பிரிவில் அனுமதிக்கப்பட்டுள்ளார்.

சுமார் 225 மில்லியன் டாலர் சொத்து மதிப்பு கொண்ட வடிம் யெர்மோலேவ், ரியல் எஸ்டேட் மற்றும் மதுபான உற்பத்தியில் ஈடுபட்டு வந்த உக்ரைனின் முன்னணி தொழிலதிபர் ஆவார். ரஷ்யா – உக்ரைன் போருக்கு மத்தியில் ரஷ்யாவுடன் வணிகத் தொடர்பு வைத்திருந்ததாகக் கூறி உக்ரைன் அரசு கடந்த 2023-ஆம் ஆண்டு இவர் மீது பொருளாதாரத் தடைகளை விதித்திருந்தது. இதனால், இந்தத் தாக்குதலுக்குப் பின்னணியில் உக்ரைனிய உளவு அமைப்புகள் இருக்கலாம் அல்லது தனிப்பட்ட தொழில்முறைப் பகை காரணமாக இருக்கலாம் என்ற கோணங்களில் பிரான்ஸ் மற்றும் மொனாக்கோ காவல்துறையினர் தீவிர விசாரணை நடத்தி வருகின்றனர்.

குண்டுவெடிப்புச் சம்பவத்தைத் தொடர்ந்து குற்றவாளி அருகிலுள்ள பிரெஞ்சு எல்லை வழியாகத் தப்பிச் சென்றிருப்பது கண்டறியப்பட்டுள்ளதால், ஐரோப்பியப் பொலிஸார் அவரைக் பிடிக்கத் தீவிர தேடுதல் வேட்டையில் ஈடுபட்டுள்ளனர். மொனாக்கோ நாட்டின் வரலாற்றிலேயே இதுபோன்றதொரு திட்டமிடப்பட்ட கொடூரப் பயங்கரவாத பாணித் தாக்குதல் நடைபெற்றது இதுவே முதன்முறை என்பதால், அங்கிருக்கும் பணக்காரக் குடும்பங்களும் சர்வதேச தொழிலதிபர்களும் கடும் பீதியில் ஆழ்ந்துள்ளனர்.