அமெரிக்கா மற்றும் இஸ்ரேலுடனான கடுமையான போருக்கு இடையே, தனது வான்வழிப் பாதுகாப்புப் படையைப் பலப்படுத்தும் நோக்கில் சீனாவிடமிருந்து தோளில் வைத்து சுடும் சுமார் 400 அதிநவீன ஏவுகணை அமைப்புகளை (MANPADS) வாங்குவதற்கு ஈரான் ஒப்பந்தம் செய்துள்ளதாகச் சர்வதேசச் செய்திகள் தெரிவிக்கின்றன. ஹாங்காங்கைச் சேர்ந்த இடைத்தரகு நிறுவனம் மூலம் சுமார் $60 முதல் $70 மில்லியன் டாலர் மதிப்பில் மேற்கொள்ளப்பட்டுள்ள இந்த இரகசிய ஒப்பந்தத்தின் முதல் கட்ட ஏவுகணைகள் இன்னும் சில வாரங்களில் ஈரானைச் சென்றடையும் என எதிர்பார்க்கப்படுகிறது.
சமீபத்திய போரின் போது அமெரிக்கா மற்றும் இஸ்ரேலிய போர் விமானங்கள் ஈரானின் முக்கிய ராணுவ தளங்கள், ஏவுகணை மையங்கள் மற்றும் உள்கட்டமைப்புகள் மீது நடத்திய தாக்குதல்களால் ஈரானிய வான் பாதுகாப்பு அமைப்புகள் கடுமையாகச் சேதமடைந்தன. இந்த பலவீனத்தைச் சரிசெய்யவும், தாழ்வாகப் பறந்து வரும் விமானங்கள், ஹெலிகாப்டர்கள் மற்றும் ட்ரோன்களைத் துல்லியமாகச் சுட்டு வீழ்த்தவும் ‘QW-12’ மற்றும் ‘FN-16’ ரக தோளில் வைத்து சுடும் ஏவுகணைகளை வாங்குவதில் ஈரான் தீவிர ஆர்வம் காட்டி வருகிறது.
இந்த ஏவுகணைகள் சிறிய ரகத்தைச் சேர்ந்தவை என்பதால், ராணுவ வீரர்கள் இவற்றை மிக எளிதாகவும் வேகமாகவும் வெவ்வேறு இடங்களுக்குக் கொண்டு சென்று தாக்குதல் நடத்த முடியும். இதனால் நிலையான வான் பாதுகாப்பு தளங்களை விடவும் இவை எதிரி படைகளால் எளிதில் கண்டறியப்பட முடியாது என பாதுகாப்பு துறை வல்லுநர்கள் தெரிவிக்கின்றனர். மேலும், இந்த ஏவுகணை விநியோகம் சீனாவிலிருந்து பாகிஸ்தான் வான்வழி வழியாக ஈரானுக்குக் கொண்டு செல்லத் திட்டமிடப்பட்டுள்ளதாகத் தகவல்கள் தெரிவிக்கின்றன.
இருப்பினும், இந்தச் செய்திகளைச் சீன வெளியுறவுத் துறை அமைச்சகம் திட்டவட்டமாக மறுத்துள்ளது. “இந்தத் தகவல்கள் முற்றிலும் ஆதாரமற்றவை; மத்திய கிழக்கில் அமைதியைக் கொண்டுவரவே சீனா தொடர்ந்து முயற்சி செய்து வருகிறது” என பீஜிங் விளக்கம் அளித்துள்ளது. அதேபோல, ஆயுதப் போக்குவரத்தில் தங்களுக்கு எந்தப் பங்கும் இல்லை எனப் பாகிஸ்தான் ராணுவமும் மறுத்துள்ளது. இருப்பினும், இந்த ஏவுகணை ஒப்பந்தம் உண்மையானால், அது அமெரிக்கா மற்றும் சீனா இடையேயான ராஜதந்திர உறவில் மேலும் பெரும் விரிசலை ஏற்படுத்தும் எனக் கருதப்படுகிறது.
